لاہور / لندن – پاکستان کے سینئر ٹینس کھلاڑی طلحہ وحید نے ایک منٹ میں سب سے زیادہ کامیاب ٹینس سروسز کرنے کا عالمی اعزاز حاصل کرتے ہوئے گنیز ورلڈ ریکارڈ اپنے نام کر لیا ہے، جس کے بعد انہیں بین الاقوامی سطح پر باضابطہ طور پر تسلیم کر لیا گیا ہے۔
گنیز ورلڈ ریکارڈز کے مطابق طلحہ وحید نے ایک منٹ میں 59 کامیاب ٹینس سروسز انجام دیں، جس کے ذریعے انہوں نے 2019 میں قائم کیا گیا 42 سروسز کا سابقہ عالمی ریکارڈ توڑ دیا۔
یہ ریکارڈ طلحہ وحید نے 8 نومبر 2024 کو لاہور میں قائم کیا تھا، جبکہ گنیز ورلڈ ریکارڈز کی جانب سے انہیں باضابطہ سرٹیفکیٹ لندن میں منعقدہ ایک خصوصی تقریب میں پیش کیا گیا۔
طلحہ وحید کا کہنا ہے کہ یہ کامیابی صرف ان کی ذاتی محنت کا نتیجہ نہیں بلکہ پاکستانی کھیلوں، بالخصوص سینئر ایتھلیٹس کی صلاحیتوں اور عزم کا واضح ثبوت ہے۔ انہوں نے اپنے کوچ، پاکستان ٹینس فیڈریشن اور ساتھی کھلاڑیوں کا خصوصی شکریہ ادا کیا۔
پاکستان ٹینس فیڈریشن کے صدر اعصام الحق قریشی نے اس کامیابی کو پاکستان میں ٹینس کے فروغ کے لیے ایک بڑا اعزاز قرار دیتے ہوئے کہا کہ طلحہ وحید کا کارنامہ نوجوان کھلاڑیوں کے لیے مشعلِ راہ ہے اور اس سے ملک میں ٹینس کے مثبت تشخص کو تقویت ملے گی۔
طلحہ وحید نے مستقبل میں مزید عالمی ریکارڈز قائم کرنے کے عزم کا اظہار کرتے ہوئے کہا کہ وہ پاکستان کے لیے مزید اعزازات حاصل کرنے کے لیے بھرپور محنت جاری رکھیں گے۔
About The Author
