ویسٹ انڈیز سے تعلق رکھنے والے معروف کرکٹ امپائر کرس ٹیلر بدھ سے نیشنل اسٹیڈیم میں شروع ہونے والے پریذیڈنٹ ٹرافی گریڈ ون کے چار روزہ میچ میں بطور آن فیلڈ امپائر فرائض انجام دیں گے۔
تفصیلات کے مطابق 45 سالہ کرس ٹیلر، جو بین الاقوامی اور ڈومیسٹک کرکٹ میں امپائرنگ کا وسیع تجربہ رکھتے ہیں، آئی سی سی امپائرز ایکسچینج پروگرام کے تحت پاکستان پہنچے ہیں۔ وہ پریذیڈنٹ ٹرافی کے مجموعی طور پر تین فرسٹ کلاس میچز میں اپنی ذمہ داریاں ادا کریں گے۔
جمیکا سے تعلق رکھنے والے کرس ٹیلر اب تک پانچ ویمنز ون ڈے انٹرنیشنل اور تین ویمنز ٹی ٹوئنٹی انٹرنیشنل میچز میں امپائرنگ کر چکے ہیں۔ اس کے علاوہ وہ 41 فرسٹ کلاس، 56 لسٹ اے اور 53 ٹی ٹوئنٹی میچز میں بھی بطور امپائر خدمات انجام دے چکے ہیں۔
کرس ٹیلر بدھ کے روز نیشنل اسٹیڈیم میں ایس این جی پی ایل اور غنی گلاس کے درمیان میچ سے اپنے فرائض کا آغاز کریں گے۔ اس کے بعد وہ 27 جنوری سے کے سی سی اے اسٹیڈیم میں کے آر ایل اور ایس این جی پی ایل کے درمیان مقابلے کی نگرانی کریں گے۔
وہ اپنی آخری ذمہ داری 2 فروری سے نیشنل اسٹیڈیم میں پی ٹی وی اور ساحر ایسوسی ایشن ایٹس کے درمیان کھیلے جانے والے میچ میں انجام دیں گے۔
About The Author
