لاہور — غزہ میں اسرائیلی فائرنگ کا نشانہ بننے والی فلسطینی بچی ہند رجب کے دل دہلا دینے والے واقعے سے متاثر ہو کر بنائی گئی فلم ’دی وائس آف ہند رجب‘ کو آسکر ایوارڈز 2026 میں بہترین بین الاقوامی فیچر فلم کی کیٹگری میں نامزد کر لیا گیا ہے۔
عرب نیوز کے مطابق یہ فلم معروف تیونسی ہدایتکارہ کاوتر بن ہانیا نے بنائی ہے، جسے سعودی عرب کے ریڈ سی فلم فنڈ کی معاونت حاصل رہی۔
غزہ کی معصوم آواز پر مبنی کہانی
فلم کی کہانی فلسطینی بچی ہند رجب حمادہ کے گرد گھومتی ہے جو گزشتہ برس غزہ سٹی میں اسرائیلی فوجی حملوں کے دوران اپنے چھ رشتہ داروں کے ہمراہ محفوظ مقام کی تلاش میں گاڑی میں فرار کی کوشش کر رہی تھیں۔
رپورٹس کے مطابق اسرائیلی فوج کی فائرنگ سے گاڑی میں سوار تمام افراد جاں بحق ہو گئے، جبکہ ہند رجب عارضی طور پر زندہ بچ گئیں، تاہم بعد ازاں انہیں بھی گولی مار کر شہید کر دیا گیا۔
مدد کے لیے ریڈ کریسنٹ ریسکیو سروس کو کی جانے والی ان کی ریکارڈ شدہ آخری فون کالز نے دنیا بھر میں شدید ردعمل کو جنم دیا اور اسرائیلی کارروائیوں پر عالمی سطح پر غم و غصہ بڑھ گیا۔
عالمی فلمی شخصیات کی شمولیت
فلم کے ایگزیکٹو پروڈیوسرز میں بین الاقوامی سطح کے کئی نمایاں نام شامل ہیں، جن میں:
-
ہالی ووڈ اداکار جواکین فینکس
-
عالمی شہرت یافتہ اداکار بریڈ پٹ
-
آسکر ایوارڈ یافتہ ہدایتکار جوناتھن گلیزر (The Zone of Interest)
-
معروف میکسیکن فلم ساز الفونسو کورون (Roma)
شامل ہیں۔
ریڈ سی فلم فاؤنڈیشن کا ردعمل
آسکر نامزدگی کے اعلان کے بعد ریڈ سی فلم فاؤنڈیشن نے انسٹاگرام پر جاری بیان میں کہا "ہمیں فخر ہے کہ کاوتر بن ہانیا کی فلم ’دی وائس آف ہند رجب‘ کو 2026 کے آسکرز میں بہترین بین الاقوامی فیچر فلم کے لیے نامزد کیا گیا ہے۔ یہ نامزدگی فلم کے تخلیقی وژن اور پوری ٹیم کی انتھک محنت کا اعتراف ہے۔”
بیان میں مزید کہا گیا کہ یہ فلم سال کی نمایاں ترین عالمی فلموں میں شمار کی جا رہی ہے۔
وینس فلم فیسٹیول میں بڑی کامیابی
یہ فلم ستمبر 2025 میں وینس انٹرنیشنل فلم فیسٹیول میں پیش کی گئی تھی، جہاں اسے سلور لائن گرینڈ جیوری پرائز سے نوازا گیا — جو فیسٹیول کا دوسرا بڑا اعزاز سمجھا جاتا ہے۔
فلم ناقدین کے مطابق ’دی وائس آف ہند رجب‘ نہ صرف ایک سینمائی شاہکار ہے بلکہ غزہ میں جاری انسانی المیے کی ایک طاقتور دستاویز بھی ہے۔
About The Author
