بنکاک — تھائی لینڈ کے شمالی صوبے چیانگ مائی میں فوجی تربیتی مشن کے دوران ایک چھوٹا جنگی طیارہ گر کر تباہ ہو گیا، جس کے نتیجے میں دو پائلٹ ہلاک ہو گئے۔شنہوا نیوز ایجنسی کے مطابق رائل تھائی ایئر فورس (RTAF) کے ترجمان چکرت تھمّاویچائی نے بتایا کہ اے ٹی–6 ٹی ایچ (AT-6TH) طیارہ، جو وِنگ 41 سے منسلک تھا، مقامی وقت کے مطابق جمعرات کی صبح 10 بج کر 20 منٹ پر حادثے کا شکار ہوا۔
ترجمان کے مطابق طیارہ چیانگ مائی انٹرنیشنل ایئرپورٹ سے تقریباً 60 کلومیٹر جنوب مغرب میں واقع ضلع چوم تھونگ کے علاقے میں گر کر تباہ ہوا۔
تربیتی مشق کے دوران حادثہ
حادثے کے وقت دونوں پائلٹ کمبیٹ سرچ اینڈ ریسکیو (Combat Search and Rescue) کی تربیتی مشق میں مصروف تھے۔ حکام کے مطابق جائے حادثہ کے آس پاس کسی شہری کے زخمی ہونے یا املاک کے نقصان کی کوئی اطلاع موصول نہیں ہوئی۔
تحقیقات کا آغاز
رائل تھائی ایئر فورس نے واقعے کی تصدیق کرتے ہوئے کہا ہے کہ “حادثے کی وجوہات جاننے کے لیے ہوا بازی کے حفاظتی اصولوں کے تحت مکمل اور شفاف تحقیقات کی جائیں گی۔”فضائیہ کی جانب سے جاں بحق ہونے والے پائلٹس کے اہلِ خانہ سے گہرے دکھ اور افسوس کا اظہار کیا گیا ہے اور مکمل تعاون فراہم کرنے کی یقین دہانی بھی کرائی گئی ہے۔حکام کا کہنا ہے کہ تحقیقات مکمل ہونے کے بعد حادثے سے متعلق تفصیلی رپورٹ جاری کی جائے گی۔
About The Author
