یورپی یونین نے روس کے ساتھ جاری کشیدگی کے تناظر میں یوکرین کو بڑے پیمانے پر مالی معاونت فراہم کرنے کا اعلان کیا ہے۔ کیف میں یورپی قیادت کی مشترکہ پریس کانفرنس کے دوران بتایا گیا کہ یوکرین کو 90 ارب یورو کا دفاعی قرض دیا جائے گا تاکہ وہ اپنی فوری عسکری ضروریات پوری کر سکے۔
یورپی حکام کے مطابق اس مالی پیکج کا مقصد یوکرین کی دفاعی صلاحیت کو مضبوط بنانا اور روس کے خلاف اس کی مزاحمتی پوزیشن کو مستحکم کرنا ہے۔ اعلامیے میں کہا گیا کہ پہلی قسط ایسٹر سے قبل جاری کیے جانے کا امکان ہے، جبکہ باقی رقم مرحلہ وار فراہم کی جائے گی۔
یہ اعلان ایسے وقت میں سامنے آیا ہے جب یوکرین کو محاذِ جنگ پر ہتھیاروں، فضائی دفاعی نظام اور فوجی سازوسامان کی فوری ضرورت ہے۔ یورپی یونین کا کہنا ہے کہ یہ قرض یوکرین کی خودمختاری اور علاقائی سالمیت کے تحفظ کے لیے اہم کردار ادا کرے گا۔
تجزیہ کاروں کے مطابق یہ اقدام نہ صرف کیف کی دفاعی پوزیشن کو مضبوط کرے گا بلکہ ماسکو کے لیے ایک واضح سیاسی پیغام بھی ہے کہ یورپ یوکرین کی حمایت جاری رکھے گا۔
About The Author
