ٹرمپ کا مسلم امریکی ارکان کانگریس کے خلاف متنازعہ بیان، الہان عمر اور رشیدہ طلیب کو ملک سے نکالنے کا مطالبہ -

امریکی صدر ڈونلڈ ٹرمپ نے مسلم امریکی ارکان کانگریس الہان عمر اور رشیدہ طلیب کے خلاف سخت اور متنازع بیان دیتے ہوئے کہا کہ دونوں کو ملک سے نکال دینا چاہیے اور ان کے آبائی ممالک واپس بھیج دیا جائے۔

صدر ٹرمپ نے دونوں پر ‘پاگل’ اور ‘دماغی طور پر بیمار’ ہونے کے الزامات بھی عائد کیے۔ یہ بیان اس وقت سامنے آیا جب منگل کے روز کانگریس میں اپنے خطاب کے دوران الہان عمر اور رشیدہ طلیب نے ٹرمپ کی امیگریشن پالیسیوں پر تنقید کی تھی۔

امریکی مسلم تنظیم کونسل آن امریکن اسلامک ریلیشنز نے ٹرمپ کے بیانات کو متعصبانہ قرار دیا اور کہا کہ اس طرح کے بیانات سیاسی تقسیم اور نفرت کو فروغ دیتے ہیں۔ تنظیم نے مزید کہا کہ منتخب عوامی نمائندوں کے خلاف اس نوعیت کی زبان جمہوری اقدار کے منافی ہے اور اس کی مذمت کی جانی چاہیے۔

یہ بیان امریکی سیاسی ماحول میں کشیدگی اور مسلم امریکی برادری کے تحفظات میں اضافہ کا باعث بننے کا خدشہ ظاہر کرتا ہے۔