لاہور – پاکستانی یوٹیوبر اور فیملی وی لاگر Rajab Butt نے اپنی اہلیہ Iman Fatima سے شادی ختم کرنے کا باضابطہ اعلان کر دیا ہے۔ رجب بٹ نے حال ہی میں ایک پوڈکاسٹ میں گفتگو کرتے ہوئے کہا کہ وہ اس شادی کو مزید جاری نہیں رکھ سکتے اور اس رشتے کو ختم کرنے کا فیصلہ کر چکے ہیں۔
رجب بٹ نے 2024 میں ایمان فاطمہ سے شادی کی تھی اور اس شادی کی تقریبات سوشل میڈیا پر خاصی وائرل ہوئی تھیں۔ مداحوں کی جانب سے اس جوڑے کو کافی پذیرائی بھی ملی، تاہم شادی کے بعد دونوں کے درمیان تعلقات زیادہ عرصہ بہتر نہ رہ سکے اور وہ ساتھ رہنے میں کامیاب نہ ہو سکے۔
پوڈکاسٹ میں گفتگو کرتے ہوئے رجب بٹ کا کہنا تھا کہ وہ منافقت پر مبنی رشتہ یا دوستی نہیں نبھا سکتے، اس لیے انہوں نے اس شادی کو ختم کرنے کا فیصلہ کیا ہے۔ انہوں نے کہا کہ اس فیصلے کے باوجود ان کے بیٹے Keyan Butt کی اہمیت ان کی زندگی میں سب سے زیادہ ہے اور وہ ہمیشہ اس سے محبت اور اس کی مکمل حمایت کرتے رہیں گے۔
رجب بٹ نے مزید کہا کہ وہ ایک سال پرانی شادی کو اپنے 30 سال پرانے والدین پر ترجیح نہیں دے سکتے، اسی لیے انہوں نے یہ مشکل فیصلہ کیا۔ ان کے مطابق ان کی تمام دولت بھی ان کے بیٹے کے نام ہوگی۔
یوٹیوبر نے یہ بھی الزام لگایا کہ ان کی اہلیہ نے مبینہ طور پر ان کی والدہ پر پرفیوم چوری کرنے کا الزام لگایا تھا اور اس معاملے سے متعلق متعدد پیغامات بھی موجود ہیں جنہیں وہ عوام کے سامنے شیئر نہیں کرنا چاہتے۔ انہوں نے کہا کہ وہ اپنے والدین کو نظر انداز نہیں کر سکتے، اسی لیے انہوں نے اس رشتے کو ختم کرنے کا فیصلہ کیا۔
واضح رہے کہ اس سے قبل میڈیا رپورٹس میں یہ بھی سامنے آیا تھا کہ برطانیہ نے رجب بٹ کو ملک بدر کر دیا تھا، جس کے بعد وہ پاکستان واپس آ گئے تھے۔
About The Author
