ترکی کی معروف دفاعی ٹیکنالوجی کمپنی ASELSAN نے جدید سمندری ڈرونز متعارف کرا دیے ہیں، جنہیں استنبول میں جاری دفاعی نمائش SAHA Expo 2026 میں پیش کیا گیا۔
نمائش میں متعارف کرائے گئے جدید ڈرونز میں ’’طوفان‘‘ نامی ان مینڈ سرفیس وہیکل (USV) خاص توجہ کا مرکز بنا رہا۔ کمپنی کے مطابق یہ ڈرون سطحِ سمندر پر خودکار جنگی کارروائیوں کے لیے تیار کیا گیا ہے اور حملوں کے ساتھ جاسوسی اور انٹیلیجنس مشنز انجام دینے کی صلاحیت بھی رکھتا ہے۔
کمپنی کا کہنا ہے کہ 8.1 میٹر طویل ’’طوفان‘‘ ڈرون پیٹرول انجن اور واٹر جیٹ پروپلژن سسٹم سے چلتا ہے، جس کے باعث یہ تیز رفتار نقل و حرکت اور فوری تعیناتی کی صلاحیت رکھتا ہے۔ اسے ساحلی علاقوں کے علاوہ کھلے سمندر میں بھی مؤثر انداز میں استعمال کیا جا سکتا ہے۔
جدید سمندری ڈرون خودکار نیویگیشن، رکاوٹوں سے بچاؤ اور وژن بیسڈ ٹارگٹ شناختی نظام سے لیس ہے، جس کے ذریعے یہ اہداف کی نشاندہی اور نگرانی انجام دے سکتا ہے۔
کمپنی کے مطابق ’’طوفان‘‘ ہائی ایکسپلوسیو وارہیڈ سے بھی لیس ہے، جس کے ذریعے یہ سطحِ سمندر پر موجود اہداف، ساحلی تنصیبات اور اہم فوجی اثاثوں کو نشانہ بنانے کی صلاحیت رکھتا ہے۔
دفاعی ماہرین کے مطابق ترکی کی جانب سے جدید ڈرون ٹیکنالوجی میں مسلسل سرمایہ کاری خطے میں اس کی دفاعی صلاحیتوں کو مزید مضبوط بنا رہی ہے، جبکہ سمندری جنگی حکمتِ عملی میں بھی اہم تبدیلیاں متوقع ہیں۔
About The Author
