اجلاس میں ممبران الیکشن کمیشن، چیف سیکرٹری و آئی جی بلوچستان اور سینئر افسران نے خصوصی طور پر شرکت کی، چیف سیکرٹری و آئی جی نے خضدار میں دہشتگردوں کی موجودگی اور قبائلی اختلافات سے آگاہ کیا۔
الیکشن کمیشن کے مطابق حلقہ این اے 256 خضدار کی سیٹ اختر مینگل کے استعفے سے خالی ہوئی تھی، الیکشن کمیشن نے 13 فروری 2026 کو خضدار میں ضمنی انتخاب کا پروگرام جاری کیا تھا۔
کمیشن کے مطابق امن و امان کی خراب صورتحال پر 27 مارچ کو خضدار کا انتخابی شیڈول معطل کیا گیا تھا۔
بلوچستان حکام کا کہنا ہے کہ خضدار میں اس وقت ضمنی انتخاب کا انعقاد ممکن نہیں، حکام کے مطابق خضدار میں انتخابی عملے اور ووٹرز کو مکمل سکیورٹی فراہم کرنا ممکن نہیں۔
چیف الیکشن کمشنر نے کہا کہ کمیشن آئین و قانون کے تحت خضدار میں ضمنی انتخاب کروانے کا پابند ہے، بریفنگ کی روشنی میں خضدار کے ضمنی انتخابات پر مناسب فیصلہ کرے گا۔
الیکشن کمیشن کے مطابق کوئٹہ میں لوکل گورنمنٹس کی معیاد 27 جنوری 2019 کو ختم ہو چکی ہے، کمیشن نے کوئٹہ میں حلقہ بندی کا عمل مکمل کر لیا ہے، کوئٹہ میں بلدیاتی انتخابات کا شیڈول جون کے دوسرے ہفتے میں جاری کیا جا سکتا ہے۔
الیکشنز ایکٹ اور بلوچستان لوکل گورنمنٹ ایکٹ کے تحت کوئٹہ بلدیاتی انتخابات کے لیے صوبائی حکومت سے مشاورت ضروری ہے۔
چیف سیکرٹری نے کہا کہ کوئٹہ بلدیاتی انتخابات کا معاملہ صوبائی کابینہ کے اجلاس میں رکھا جائے گا۔
الیکشن کمیشن نے صوبائی حکومت سے ڈرافٹ شیڈول پر موقف جلد دینے کی ہدایت کر دی، کمیشن کا مقصد آئین و قانون کے مطابق کوئٹہ میں بلدیاتی انتخابات کا انعقاد یقینی بنانا ہے۔
About The Author
