پنجاب کی حکومت نے صوبے بھر کے تھیٹرز کے لیے سیکیورٹی سے متعلق نئے اور سخت ایس او پیز جاری کر دیے ہیں جن کے تحت تھیٹر ہالز کے انتظامی، سیکیورٹی اور ریکارڈ کے نظام کو مزید منظم بنایا جائے گا۔
انتظامیہ کے مطابق ہر تھیٹر ہال کو اپنی سیکیورٹی صورتحال، وسائل اور انتظامات کے حوالے سے تفصیلی رپورٹ ہر ماہ متعلقہ ادارے کو جمع کروانا ہوگی۔ اس اقدام کا مقصد تھیٹرز میں سیکیورٹی کے معیار کو بہتر بنانا اور کسی بھی ناخوشگوار واقعے سے بچاؤ کو یقینی بنانا ہے۔
نئے ایس او پیز کے تحت تمام تھیٹر ہالز کو اپنے سالانہ لائسنس اور ہر ڈرامے کے اجازت نامے الگ الگ بنیادوں پر حاصل کرنا ہوں گے۔ حکام نے واضح کیا ہے کہ اس معاملے میں کسی بھی قسم کی کوتاہی برداشت نہیں کی جائے گی۔
مزید ہدایت کے مطابق ہر سنسر ریہرسل کے دوران ڈرامے میں کام کرنے والے تمام فنکاروں کے اصل نام، شناختی کارڈ کی کاپیاں اور مکمل کوائف فراہم کرنا لازمی ہوگا۔
اس کے علاوہ ہر تھیٹر ہال کو اپنے ڈراموں کے مصنف، ہدایتکار اور پروڈیوسر کا مکمل ریکارڈ بھی باقاعدگی سے متعلقہ اداروں میں جمع کروانا ہوگا تاکہ شفافیت اور نگرانی کے نظام کو بہتر بنایا جا سکے۔
حکومت کے مطابق یہ اقدامات تھیٹر انڈسٹری میں نظم و ضبط قائم کرنے، سیکیورٹی خدشات کم کرنے اور قانونی تقاضوں کو سختی سے نافذ کرنے کے لیے کیے گئے ہیں۔
About The Author
