پشاور سے اسکردو تک 800 کلومیٹر نان اسٹاپ دوڑ، پاکستانی نوجوان نے عالمی ریکارڈ قائم کر دیا -

پاکستان کے نوجوان ایتھلیٹ مسعود خان نے پشاور سے اسکردو تک تقریباً 800 کلومیٹر طویل نان اسٹاپ دوڑ مکمل کر کے عالمی ریکارڈ اپنے نام کر لیا۔

مسعود خان نے قراقرم ہائی وے کے دشوار گزار پہاڑی راستوں، دریائے سندھ کے حسین مناظر اور گلگت بلتستان کی بلند و بالا وادیوں سے گزرتے ہوئے یہ منفرد کارنامہ انجام دیا۔ انہوں نے مسلسل 9 دن کی انتھک محنت کے بعد 810 کلومیٹر کا سفر مکمل کیا۔

نوجوان ایتھلیٹ نے اپنی کامیابی کو پاکستان کے نام کرتے ہوئے کہا کہ انہوں نے دنیا بھر میں ملک کا نام روشن کرنے کے لیے یہ چیلنج قبول کیا۔ ان کا کہنا تھا کہ راستے میں شدید جسمانی تھکن، دشوار راستوں اور مسلسل دوڑ کے باعث کئی مرتبہ قدم ڈگمگائے، لیکن قومی جذبے نے انہیں ہمت نہ ہارنے دی۔

مسعود خان کے مطابق پشاور سے اسکردو تک مسلسل دوڑ اپنی نوعیت کا پہلا اور منفرد کارنامہ ہے، جس نے انہیں عالمی سطح پر ایک نئی شناخت دی ہے۔

انہوں نے اس سے قبل بھی روس، جاپان اور چین سمیت مختلف ممالک کے ایتھلیٹس کے ساتھ بین الاقوامی مقابلوں میں شرکت کی اور متعدد تمغے اپنے نام کیے۔

کھیلوں کے حلقوں نے مسعود خان کی اس کامیابی کو پاکستان کے لیے باعثِ فخر قرار دیتے ہوئے کہا ہے کہ یہ کارنامہ نوجوان کھلاڑیوں کے لیے ایک نئی مثال اور حوصلہ افزائی ہے۔