چین نے ایران اور لبنان میں جاری انسانی بحران کے پیشِ نظر دونوں ممالک کے لیے انسانی امداد فراہم کرنے کا اعلان کرتے ہوئے مشرقِ وسطیٰ میں امن اور استحکام کے قیام کے لیے اپنی حمایت جاری رکھنے کے عزم کا اعادہ کیا ہے۔
چینی وزارتِ خارجہ کے ترجمان لِن جیان نے بیجنگ میں پریس بریفنگ کے دوران کہا کہ ایران سے متعلق حالیہ تنازع اور اس کے پورے مشرقِ وسطیٰ پر مرتب ہونے والے اثرات کے باعث پیدا ہونے والی انسانی صورتحال پر چین کو گہری تشویش اور افسوس ہے۔ انہوں نے کہا کہ خطے میں جاری بحران نے لاکھوں افراد کی زندگیوں کو متاثر کیا ہے اور انسانی ہمدردی کی بنیاد پر امدادی اقدامات ناگزیر ہو چکے ہیں۔
ترجمان کے مطابق چین ایران اور لبنان کے عوام کی مشکلات میں کمی لانے اور ان کے معیارِ زندگی کو بہتر بنانے کے لیے انسانی امداد فراہم کرے گا۔ امدادی پیکیج کی تفصیلات ابھی جاری نہیں کی گئیں، تاہم بیجنگ نے واضح کیا ہے کہ وہ متاثرہ آبادیوں کی ضروریات کو مدنظر رکھتے ہوئے تعاون فراہم کرے گا۔
لِن جیان نے کہا کہ چین ہمیشہ مشرقِ وسطیٰ کے ممالک کا قابلِ اعتماد دوست رہا ہے اور خطے کے تنازعات کے حل کے لیے سیاسی مذاکرات اور سفارتی ذرائع کی حمایت کرتا آیا ہے۔ ان کا کہنا تھا کہ طاقت کے استعمال کے بجائے مذاکرات اور بات چیت ہی مسائل کے پائیدار حل کی بنیاد فراہم کر سکتے ہیں۔
انہوں نے مزید کہا کہ چین مستقبل میں بھی خطے میں امن مذاکرات، کشیدگی میں کمی اور استحکام کے فروغ کے لیے مثبت اور تعمیری کردار ادا کرتا رہے گا۔ بیجنگ کا مؤقف ہے کہ عالمی برادری کو مشترکہ طور پر انسانی بحرانوں کے خاتمے اور علاقائی امن کے قیام کے لیے تعاون کرنا چاہیے۔
About The Author
