ایران کی جانب سے خطے میں مبینہ میزائل اور ڈرون حملوں کے تازہ دور کے بعد کویت نے احتیاطی اقدام کے طور پر کویت انٹرنیشنل ایئرپورٹ پر پروازوں کی آمد و رفت عارضی طور پر معطل کر دی ہے، جبکہ ایران نے کویت اور بحرین میں امریکی فوجی تنصیبات کو نشانہ بنانے کے متعدد دعوے کیے ہیں۔
کویت ایئرویز نے ایک نئی اطلاع میں مسافروں کو آگاہ کیا کہ موجودہ سیکیورٹی صورتحال اور فضائی خطرات کے باعث کویت انٹرنیشنل ایئرپورٹ پر پروازوں کی آمد اور روانگی عارضی طور پر روک دی گئی ہے۔
اس سے قبل قومی فضائی کمپنی کویت ایئرویز نے سوشل میڈیا پلیٹ فارم ایکس (X) پر جاری بیان میں کہا تھا کہ کویت کی فضائی حدود بند ہونے کے باعث بیشتر پروازوں کا شیڈول تبدیل کیا جا رہا ہے۔ ایئرلائن کے مطابق مسافروں کو نئی پروازوں کے اوقات سے متعلق بکنگ میں درج موبائل نمبروں پر نوٹیفکیشن اور ٹیکسٹ پیغامات کے ذریعے آگاہ کیا جائے گا۔
دوسری جانب ایران کی پاسدارانِ انقلاب (IRGC) نے دعویٰ کیا ہے کہ اس کی بحری فورس نے کویت کی الاحمدی بندرگاہ پر واقع اس تنصیب کو نشانہ بنایا جو امریکی بحری بیڑے کو ایندھن کی معاونت فراہم کرتی تھی۔
ایرانی خبر رساں ادارے تسنیم کے مطابق، پاسدارانِ انقلاب نے یہ دعویٰ بھی کیا ہے کہ بحرین میں واقع شیخ عیسیٰ ایئر بیس پر امریکی جنگی طیاروں کے اجتماع کے مقام پر ڈرون اور میزائل حملے کیے گئے۔
About The Author
