خلیج تعاون کونسل (GCC) کے سیکریٹری جنرل جاسم محمد البدیوی نے سعودی عرب کے علاقے نجران کو حوثی ملیشیا کی جانب سے کیے گئے دہشتگرد حملوں کی شدید مذمت کی ہے۔
جمعہ کو جاری اپنے بیان میں جاسم البدیوی نے حوثی حملوں کو ایک سنگین دہشتگردانہ کارروائی قرار دیتے ہوئے کہا کہ شہریوں اور شہری تنصیبات کو دانستہ اور بلاامتیاز نشانہ بنانا بین الاقوامی قوانین اور بین الاقوامی انسانی قانون کی صریح خلاف ورزی ہے۔
انہوں نے کہا کہ اس نوعیت کی کارروائی ایک ایسا جرم ہے جس کے ذمہ داروں کو جواب دہ بنایا جانا چاہیے، کیونکہ حملوں میں شہری آبادی اور غیر فوجی تنصیبات کو نشانہ بنا کر بین الاقوامی اصولوں اور ضوابط کی کھلی خلاف ورزی کی گئی۔
جی سی سی سیکریٹری جنرل نے خبردار کیا کہ حوثی ملیشیا کی دہشتگرد کارروائیاں صرف سعودی عرب کی سلامتی کے لیے نہیں بلکہ پورے خطے اور عالمی امن و استحکام کے لیے بھی سنگین خطرہ ہیں۔
ان کے مطابق شہریوں کے خلاف ایسے حملے بین الاقوامی قانون کے بنیادی اصولوں سے متصادم ہیں اور خطے میں کشیدگی اور عدم استحکام کو مزید بڑھا سکتے ہیں۔
جاسم البدیوی نے واضح کیا کہ سعودی عرب کی سلامتی خلیج تعاون کونسل کے تمام رکن ممالک کی سلامتی کا لازمی حصہ ہے۔
انہوں نے کہا کہ جی سی سی سعودی عرب کے ساتھ مکمل طور پر متحد ہے اور مملکت کی سلامتی، خودمختاری اور علاقائی سالمیت کے تحفظ کے لیے اٹھائے جانے والے تمام اقدامات کی حمایت کرتا ہے۔
About The Author
