وزارتِ اطلاعات و نشریات کے ایکسٹرنل پبلسٹی ونگ نے ایک مخصوص سزا یافتہ قیدی سے متعلق بعض غیر ملکی میڈیا اداروں کی جانب سے نشر کی جانے والی گمراہ کن خبروں کا نوٹس لیتے ہوئے حقائق پر مبنی مؤقف جاری کر دیا۔
وزارت کے مطابق بعض غیر ملکی میڈیا پلیٹ فارمز پر قیدی کی حالت اور جیل میں فراہم کی جانے والی سہولیات سے متعلق ایسی رپورٹس سامنے آئی ہیں جن میں حقائق کو مسخ کرکے پیش کیا گیا ہے۔
وزارتِ اطلاعات نے واضح کیا کہ متعلقہ غیر ملکی میڈیا اداروں کو پہلے ہی اس معاملے پر حقائق اور وضاحت فراہم کی جا چکی ہے، جسے عوامی طور پر بھی ریکارڈ پر لایا جا رہا ہے۔
وزارت کے مطابق ان وضاحتوں کا مقصد نہ صرف اصل حقائق کو ریکارڈ کا حصہ بنانا ہے بلکہ یہ بھی واضح کرنا ہے کہ بعض عناصر ایک منظم ایجنڈے کے تحت مبینہ طور پر گمراہ کن معلومات کو پروپیگنڈا کے طور پر استعمال کر رہے ہیں۔
وزارتِ اطلاعات و نشریات نے اس امر پر زور دیا کہ سزا یافتہ قیدیوں سے متعلق کسی بھی معاملے پر رپورٹنگ کرتے ہوئے حقائق، سرکاری ریکارڈ اور مستند معلومات کو مدنظر رکھا جانا چاہیے تاکہ عوام کو گمراہ کن تاثر دینے سے گریز کیا جا سکے۔
