تہران : ایرانی فوج نے صبح سویرے ہونے والے اسرائیلی حملوں میں اپنے دو فوجی اہلکاروں کی شہادت کی تصدیق کی ہے۔
ایرانی سرکاری نیوز ایجنسی تسنیم نے ایران کی فوج کی جانب سے جاری اعلامیے کو نشر کرتے ہوئے کہا ہے کہ ’گزشتہ رات ایران کی سلامتی اور عوام کے تحفظ کے لیے اسرائیل کے میزائلوں کا مقابلہ کرتے ہوئے دو فوجی شہید ہو گئے ہیں۔‘تاہم دیگر ایرانی خبر رساں اداروں نے اس بارے میں ابھی مزید تفصیلات شائع نہیں کیں۔
ادھر متحدہ عرب امارات نے ایران پر اسرائیل کے حملے کی مذمت کی ہے اور ساتھ ہی ساتھ ’زیادہ سے زیادہ تحمل‘ کا مظاہرہ کرنے پر بھی زور دیا ہے تاکہ خطے میں مزید کشیدگی نہ پھیلے۔
دوسری جانب عراق کے وزیر ٹرانسپورٹ رزاق محبیس نے ملکی فضائی حدود میں پروازیں دوبارہ شروع کرنے کی تصدیق کی ہے۔
خبر رساں ادارے الجزیرہ کے مطابق عراقی وزارت ٹرانسپورٹ نے ایک بیان میں کہا ہے کہ ’عراق میں شہری ہوابازی کی سلامتی کو لاحق ممکنہ خطرات کا جائزہ لینے کے بعد وزیر ٹرانسپورٹ نے تمام ہوائی اڈوں پر تمام مسافر طیاروں کے لیے فضائی حدود کو دوبارہ کھولنے کا حکم دیا ہے۔
اس سے قبل ایران نے بھی فضائی حدود کو تھوڑی دیر پہلے بحال کر دیا تھا جنھیں حملے کے بعد بند کر دیا گیا تھا۔
