واشنگٹن : امریکا میں صدر کے انتخاب کے لیے ووٹنگ جاری ہے اور وائٹ ہاؤس کا اگلا مکین کون ہوگا اس حوالے سے صورتحال تاحال غیرواضح ہے۔
ڈونلڈ ٹرمپ اور کملا ہیرس دونوں کے درمیان کانٹے کا مقابلہ متوقع ہے اور کسی کو بھی نہیں معلوم کہ اس انتخاب میں کون فاتح ہوگا۔
یہ بھی نہیں معلوم کہ صدارتی انتخاب کے حتمی نتائج کب سامنے آئیں گے کیونکہ پینسلوینیا جیسی سوئنگ ریاستوں سے نتائج آنے میں اکثر کئی دن بھی لگ جاتے ہیں۔
یہاں یہ خدشات بھی پائے جاتے ہیں کہ پتا نہیں لوگ الیکشن کے نتائج پر کیسے ردِ عمل کا اظہار کریں گے۔ واشگٹن، اوریگون اور نیواڈا میں امریکی نیشنل گارڈ کسی بھی قسم کی بدامنی سے نمٹنے کے لیے تیار ہیں۔
ووٹرز کا کہنا ہے کہ وہ انتخابی عمل کے دوران انتہائی تھکاوٹ کا شکار ہوگئے ہیں اور چاہتے ہیں کہ صدارتی انتخاب اب بس اختتام کو پہنچیں۔
امریکہ آج پہلے سے زیادہ منقسم ہے اور ایسے میں یہاں شدید تناؤ پایا جاتا ہے۔
