امریکا میں پاکستان کے سفیر رضوان سعید شیخ نے امریکی ٹیکنالوجی کمپنیوں کو پاکستان میں اشتراکِ عمل، سرمایہ کاری اور طویل مدتی کاروباری شراکت داریوں کے وسیع اور منافع بخش مواقع سے فائدہ اٹھانے کی دعوت دی ہے۔
ڈیلاس، ٹیکساس میں پاک۔امریکہ ٹیک کنیکٹ 2026 سے خطاب کرتے ہوئے سفیر پاکستان نے کہا کہ جدید ٹیکنالوجی میں سرمایہ کاری پاک۔امریکہ اقتصادی تعلقات کے لیے تزویراتی اہمیت رکھتی ہے۔ امریکا عالمی ٹیکنالوجی کا مرکز اور پاکستان کی سب سے بڑی آئی ٹی برآمدی منڈی ہے، جبکہ ابھرتی ہوئی ٹیکنالوجیز اور مصنوعی ذہانت کے شعبوں میں دونوں ممالک کے درمیان اقتصادی تعاون کے وسیع امکانات موجود ہیں۔
رضوان سعید شیخ نے کہا کہ پاکستان کی تقریباً 60 فیصد سے زائد آبادی 30 سال سے کم عمر نوجوانوں پر مشتمل ہے، جو قومی اثاثہ اور مستقبل کے معمار ہیں۔ پاکستانی ٹیکنالوجی کمپنیوں کے پاس بین الاقوامی تجربہ اور اپنے مخصوص شعبوں میں مسلمہ مہارت موجود ہے، جس سے امریکی کاروباری ادارے فائدہ اٹھا سکتے ہیں۔
انہوں نے کہا کہ کانفرنس کا مقصد محض پاکستانی ٹیکنالوجی کمپنیوں کی کارکردگی اور صلاحیتوں کو اجاگر کرنا نہیں، بلکہ عالمی معیار کے مطابق بامعنی تجارتی روابط اور پائیدار کاروباری شراکت داریاں قائم کرنا ہے۔ پاکستان کی ابھرتی ہوئی مسابقتی برتری امریکی کاروباری اداروں کے لیے سرمایہ کاری کے اہم اور نتیجہ خیز مواقع فراہم کرسکتی ہے۔
سفیر پاکستان نے پاکستانی نژاد امریکی کمیونٹی پر بھی زور دیا کہ وہ دونوں ممالک کے درمیان کاروباری روابط بڑھانے، پاکستان کو قابلِ اعتماد اور مسابقتی ٹیکنالوجی شراکت دار کے طور پر متعارف کرانے اور عالمی سطح پر ملک کی ساکھ مضبوط بنانے میں فعال کردار ادا کرے۔
