کوئٹہ میں سردی کی آمد کے ساتھ ہی خشک میوہ جات کی قیمتوں کو بھی پر لگ گئے۔
خشک میوہ جات مہنگے نہیں، بہت مہنگے ہو گئے ہیں۔ رواں سال ان کی قیمتوں میں 30 سے 40 فیصد تک اضافہ ہو چکا ہے، جس نے سردیوں کی اس سوغات کے شوقین شہریوں کو پریشان کر دیا ہے۔
گزشتہ سال 3 ہزار روپے فی کلو ملنے والا پستہ اب 5 ہزار روپے تک جا پہنچا ہے۔ بادام کی قیمت میں بھی 1200 روپے کا اضافہ ہوا، اور یہ 3 ہزار 200 روپے فی کلو میں فروخت ہو رہا ہے۔
دیگر خشک میوہ جات بھی مہنگائی کی زد میں ہیں۔ کاجو 3 ہزار سے بڑھ کر 4 ہزار 500 روپے فی کلو ہو گیا ہے، جبکہ چلغوزے کی قیمت 6 سے 8 ہزار روپے کے درمیان ہے۔
سردیوں کی سوغات کی اس اونچی اڑان نے شہریوں کے بجٹ کو ہلا کر رکھ دیا ہے۔ قیمتوں میں اس اضافے نے عام آدمی کے لیے سردیوں کی یہ سوغات خریدنا مشکل بنا دیا ہے۔
دکانداروں کا کہنا ہے کہ پہلے ڈرائی فروٹ کی قیمتیں سال میں ایک بار بڑھتی تھیں مگر اب ان میں دنوں میں تبدیلی ہو رہی ہے۔
