پیٹرولیم لیوی میں 10 سے 15 روپے فی لیٹر کمی کا امکان، حکومت نے نیا فارمولا جاری کردیا۔
صارفین پر پیٹرولیم لیوی کا بوجھ کم کرنے کے لیےحکومت نے اقدامات شروع کردیے،پیٹرولیم ڈویژن نے آئل ریفائنریز کے لیے قیمتوں کے تعین کا نیا فارمولا جاری کردیا،جس کے تحت ریفائنریز بھی پیٹرولیم ڈویلپمنٹ لیوی میں فی لیٹر حصہ ڈالیں گی۔
ذرائع کےمطابق درآمدی کارگو پر ایکسیڈینٹل چارجزمارچ سے پہلےکی سطح پر مقرر ہوں گے اور اس سے حاصل ہونے والی بچت پیٹرولیم لیوی کم کرنے کے لیے استعمال کی جائے گی،ریفائنری ذرائع کاکہنا ہے کہ اس اقدام سے پیٹرولیم لیوی میں 10 سے 15 روپے فی لیٹر کمی ممکن ہے،تاہم ریفائنریز کو فی لیٹر 30 روپے سے زائد نقصان کا خدشہ ہے۔
نئےفارمولے کےتحت پیٹرول کی درآمدی قیمت کا تعین پی ایس او کے اصل درآمدی کارگو کی لاگت پر ہوگا، اصل درآمدی لاگت دستیاب نہ ہونے کی صورت میں آخری کارگو کا پریمیم اور اضافی اخراجات استعمال کیےجاسکیں گے،آئل ریفائنریز آئندہ 30 روز تک پیٹرول کی ایکس ریفائنری قیمت 7 مارچ 2026 کی سطح پرمقررکرسکیں گی،پریمیم، اضافی اخراجات اورکسٹمز ڈیوٹی بھی اسی سطح پر برقرار رکھنے کی اجازت ہو گی۔
ذرائع کےمطابق درآمدی اور ایکس ریفائنری قیمت کے فرق کی رقم ریفائنریز کو پیٹرولیم لیوی کی مد میں جمع کرانا ہوگی،لیوی میں ردوبدل کا فائدہ صرف پیٹرول صارفین کو منتقل کیا جائے گا۔
پیٹرولیم ڈویژن نے تمام آئل ریفائنریز کوخطوط ارسال کرتےہوئےروزانہ پیٹرول کی فروخت کی تفصیلات اوگرا اورپیٹرولیم ڈویژن کو فراہم کرنےکی ہدایت کی ہے،فروخت کی رپورٹس کےساتھ سی پی آرز اور چالان بھی جمع کرانا ہوں گے،اوگرا اورپیٹرولیم ڈویژن اضافی لیوی کی ادائیگیوں اور حسابات کی تصدیق کریں گے۔
دوسری جانب ریفائنری ذرائع نے حکومتی فیصلے کو سیاسی قرار دیتے ہوئے اس پر نظرثانی کے لیے خط لکھنے کا اعلان کیا ہے۔
