پاکستان کے معروف گلوکار شفقت امانت علی نے بتایا کہ وہ کینسر کی ایک سنگین بیماری ملٹی پل مائیلوما میں مبتلا رہ چکے ہیں، جس کے باعث انہیں طویل عرصے تک علاج اور صحت یابی کے مشکل مراحل سے گزرنا پڑا۔
شفقت امانت علی کے مطابق ان کی بیماری نے اہل خانہ، دوستوں اور مداحوں کو بھی تشویش میں مبتلا کر دیا تھا۔ انہوں نے اس دوران اپنی بیماری کی تفصیلات بعض قریبی دوستوں سے بھی چھپائے رکھیں اور تمام تر توجہ علاج پر مرکوز رکھی۔
گلوکار نے بتایا کہ انہیں بیماری کی علامات کا بروقت اندازہ ہوگیا تھا، تاہم درست تشخیص اور علاج کے لیے مختلف ڈاکٹروں سے رجوع کرنا پڑا۔ بعد ازاں کراچی میں ڈاکٹر سلمان عادل سے ملاقات کے بعد انہیں مناسب طبی رہنمائی اور علاج میسر آیا۔
شفقت امانت علی کا کہنا تھا کہ بیماری کے باعث انہیں تقریباً ایک سال تک بستر پر رہنا پڑا۔ ایک فنکار کے لیے موسیقی اور پرفارمنس سے دور رہنا انتہائی مشکل ہوتا ہے، لیکن اس وقت صحت یابی کے لیے آرام کرنا ناگزیر تھا۔
انہوں نے بتایا کہ کیموتھراپی مکمل ہونے کے بعد لاہور میں دوبارہ پرفارم کیا۔ بیماری کے بعد اسٹیج پر واپسی آسان نہیں تھی، تاہم انہوں نے ہمت نہیں ہاری اور دوبارہ موسیقی کی سرگرمیوں کا آغاز کر دیا۔
واضح رہے کہ شفقت امانت علی کا تعلق موسیقی کے معروف پٹیالہ گھرانے سے ہے۔ وہ اپنے مقبول گیت ’’خمّاج‘‘ سے پاکستان اور بھارت میں شہرت حاصل کر چکے ہیں، جبکہ بالی ووڈ فلم ’’کبھی الوداع نہ کہنا‘‘ میں شاہ رخ خان پر فلمایا گیا گیت ’’متوا‘‘ بھی ان کی عالمی شہرت کا سبب بنا۔

