سی ٹی ڈی خیبرپختونخوا کے مطابق آپریشن کے دوران خوارجی گل بہادر گروپ کا اہم دہشت گرد کمانڈر زاہد گل مارا گیا، ہلاک دہشت گرد کوہاٹ پولیس لائنز پر خودکش حملے کا مرکزی ماسٹر مائنڈ تھا۔
ترجمان سی ٹی ڈی کے مطابق ہلاک دہشت گرد نے کوہاٹ پولیس لائنز حملے میں خودکش بارود بردار گاڑی کی خود رہنمائی کی تھی، وہ دہشت گردی کے متعدد دیگر سنگین واقعات میں بھی سیکیورٹی فورسز کو انتہائی مطلوب تھا۔
سی ٹی ڈی کے مطابق زاہد گل بلی تنگ بینک ڈکیتی میں بھی موقع پر موجود تھا، اس واردات میں 60 لاکھ روپے لوٹے گئے تھے، ڈکیتی میں لوٹی گئی رقم بکاخیل اور جانی خیل میں بنوں کی دہشت گرد تشکیلوں میں تقسیم کی گئی تھی۔
ترجمان نے بتایا کہ ہلاک دہشت گرد خوارجی گل بہادر گروپ سے قریبی رابطے میں تھا اور کوہاٹ میں متعدد خودکش حملہ آوروں کی ترسیل میں ملوث رہا۔
سی ٹی ڈی خیبرپختونخوا کے مطابق دو ماہ قبل دہشت گرد نئی کوہاٹ پولیس لائنز پر حملے کے لیے بھی خودکش حملہ آور لایا تھا، تاہم یہ کوشش ناکام بنا دی گئی تھی۔
ترجمان کے مطابق ہلاک دہشت گرد کے اگلے اہداف کوہاٹ میں پی اے ایف سیٹ اپ اور پولیس ٹریننگ سکول تھے جبکہ دہشت گرد تشکیل کے دیگر کارندے پہلے ہی سیکیورٹی اداروں کی حراست میں ہیں
