یونان کی سمندری حدود میں دو کشتیاں ڈوبنے سے متعدد افراد لاپتہ ہوگئے ہیں۔ عرب میڈیا کے مطابق، حادثات یونانی جزائر ساموس اور لسبوس کے قریب پیش آئے۔
حادثے کا شکار ہونے والی دونوں کشتیوں پر غیرقانونی تارکین وطن سوار تھے۔ کشتیوں کے ڈوبنے کے بعد یونانی حکام نے امدادی کارروائیاں شروع کردیں۔
عرب میڈیا کی رپورٹ کے مطابق، یونانی کوسٹ گارڈز نے 14 افراد کو بچالیا ہے۔ لاپتہ افراد کی تلاش کے لیے کارروائیاں جاری ہیں۔
تاحال لاپتہ افراد کی درست تعداد اور ان کی شناخت کے بارے میں مزید تفصیلات سامنے نہیں آئیں۔
رپورٹ کے مطابق، یونانی حکام نے انسانی اسمگلنگ کے الزام میں بعض افراد کو حراست میں لیا ہے۔ حکام واقعے کی تحقیقات کررہے ہیں۔
یونان کے قریب تارکین وطن کی کشتیوں کے حادثات انسانی اسمگلنگ اور خطرناک سمندری سفر کے مسائل کو ایک بار پھر اجاگر کرتے ہیں۔
