وفاقی دارالحکومت میں امن و امان کی صورتحال کو مزید مستحکم بنانے اور ہنگامی حالات سے نمٹنے کے لیے اسلام آباد پولیس کی سپیشل ویپن اینڈ ٹیکٹس فورس (SWAT) کی آپریشنل صلاحیتوں میں اضافہ کرتے ہوئے فورس کو 20 نئی گاڑیاں فراہم کر دی گئی ہیں۔
وفاقی وزارتِ داخلہ کی جانب سے نئی گاڑیاں سواٹ فورس کے حوالے کرنے کے سلسلے میں ایک خصوصی تقریب کا انعقاد کیا گیا، جس میں وفاقی وزیرِ داخلہ محسن نقوی نے بطور مہمانِ خصوصی شرکت کی۔ اس موقع پر آئی جی اسلام آباد پولیس اور دیگر اعلیٰ پولیس افسران بھی موجود تھے۔
تقریب کے دوران وزیرِ داخلہ محسن نقوی نے فورس کو دی جانے والی نئی گاڑیوں کا تفصیلی معائنہ کیا اور سواٹ فورس کے جوانوں سے ملاقات کرتے ہوئے ان کے پیشہ ورانہ جذبے کو سراہا۔ وزیرِ داخلہ نے فورس کی ضروریات کو مدنظر رکھتے ہوئے سواٹ فورس کے لیے مزید 20 نئی گاڑیاں فراہم کرنے کا بھی فیصلہ کیا ہے۔
اس موقع پر گفتگو کرتے ہوئے وفاقی وزیرِ داخلہ محسن نقوی کا کہنا تھا کہ نئی گاڑیوں کی شمولیت سے سواٹ فورس کی آپریشنل صلاحیتوں اور استعدادِ کار میں مزید اضافہ ہوگا۔ انہوں نے اس عزم کا اظہار کیا کہ سواٹ فورس کسی بھی ہنگامی صورتحال یا ناگہانی آفت میں ‘فرسٹ ریسپونڈر’ (First Responder) کے طور پر فوری اور مؤثر کارروائی عمل میں لائے گی، جس سے شہریوں کے جان و مال کا تحفظ یقینی بنایا جا سکے گا۔

