پاکستان سپر لیگ کے جاری ٹورنامنٹ میں ملتان سلطانز نے پشاور زلمی کو 120 رنز سے شکست دے دی۔
راولپنڈی کرکٹ اسٹیڈیم میں کھیلے گئے میچ میں پشاور زلمی نے پہلے بیٹنگ کرتے ہوئے مقررہ 20 اوورز میں 7 وکٹوں کے نقصان پر 227 رنز بنائے۔
ہدف کے تعاقب میں ملتان سلطانز کی بیٹنگ مکمل طور پر ناکام رہی اور پوری ٹیم 15.5 اوورز میں 107 رنز پر ڈھیر ہوگئی۔
ملتان سلطانز کی پہلی وکٹ کپتان محمد رضوان کی گری جو 15 رنز بنانے کے بعد پویلین واپس لوٹ گئے، دوسرے اوپنر شائے ہوپ بھی 20 رنز ہی بناسکے۔
عثمان خان 44 رنز بنا کر آؤٹ ہوئے، کامران غلام 6، مائیکل بریسویل 3، ایشٹن ٹرنر صفر، افتخار احمد 2، اسامہ میر ایک رن ہی بناسکے۔
پشاور زلمی نے ملتان سلطانز کے خلاف ٹاس جیت کر پہلے بیٹنگ کرنے کو ترجیح دی۔
محمد حارث 21 گیندوں پر 45 رنز بنا کر آؤٹ ہوئے جس کے بعد حسین طلعت نے بھی 29 گیندوں پر 37 رنز کی اننگز کھیلی۔
ٹام کوہلر کوڈ مور نے رواں سیزن میں اپنی پہلی نصف سینچری مکمل کی، وہ 30 گیندوں پر 52 رنز بناکر آؤٹ ہوئے جب کہ مچل اوون نے بھی 15 گیندوں پر 34 رنز کی جارحانہ اننگز کھیلی۔
پی ایس ایل 10 میں اپنا پہلا میچ کھیلنے والے عبدالصمد نے 14 گیندوں پر 40 رنز بنائے، جس میں 3 چھکے اور 4 چوکے شامل تھے۔
ملتان سلطانز کی جانب سے ڈیوڈ ویلے ، مائیکل بریسویل اور عبید شاہ نے 2،2 وکٹیں حاصل کیں۔
پشاور زلمی نے 3 تبدیلیاں کرتے ہوئے عبدالصمد، لک ووڈ اور عارف یعقوب کو اسکواڈ میں شامل کیا جب کہ ملتان سلطانز نے دو تبدیلیاں کی ہیں عاقف جاوید اور ایشٹن ٹرنر کو ٹیم میں شامل کیا گیا ہے۔
