پاکستان کے نائب وزیراعظم اسحاق ڈار نے کہا ہے کہ پاکستان سمیت دنیا کے کئی ممالک میں بھارتی دہشت گردی کے دستاویزی ثبوت موجود ہیں۔
انہوں نے کہا ہلگام واقعے کے بعد بھارت نے غیرذمہ دارانہ اور جارحانہ رویہ اختیار کیا جب کہ پاکستان ہر قسم کی دہشت گردی کی مذمت کرتا ہے۔
اسحٰق ڈار نے ڈائریکٹر جنرل (ڈی جی) انٹر سروسز پبلک ریلیشن (آئی ایس پی آر) لیفٹیننٹ جنرل احمد شریف چوہدری کے ہمراہ پریس کانفرنس کر رہے ہیں، ان کے ہمراہ ترجمان دفتر خارجہ شفقت علی خان بھی موجود ہیں۔
نائب وزیراعظم کا کہنا تھا کہ معصوم شہریوں کا قتل قابل مذمت ہے اور پاکستان ہر قسم کی دہشت گردی کی مذمت کرتا ہے، کوئی بھی مقصد یا سبب بے گناہ افراد کی جان لینے کا جواز پیش نہیں کر سکتا، ایک انسان کی جان لینا پوری انسانیت کا قتل ہے، یہی ہماری قومی اور اسلام کی بھی پالیسی ہے۔
انہوں نے کہا کہ پاکستان کا پہلگام واقعے سے کوئی تعلق نہیں ہے لیکن بھارت نے پہلگام واقعے کے بعد غیر ذمہ دارانہ اور جارحانہ رویہ اختیار کیا، پورا خطہ بھارت کے غیر ذمہ دارانہ اقدامات کی وجہ سے خطرے میں ہے۔
ان کا کہنا تھا کہ پہلگام واقعے میں ہونے والی انسانی جانوں کے نقصان پر افسوس کا اظہار کرتے ہیں، معصوم شہریوں کا قتل قابل مذمت ہے، دہشتگردی کے متاثرین کا دکھ پاکستان سے بہتر کوئی نہیں جانتا جب کہ اقوام متحدہ کی سیکورٹی کونسل کی جانب سے بھی اس حملے کی مذمت کی گئی ہے۔
اسحٰق ڈار نے کہا کہ دوسری جانب بھارت، پاکستان سمیت دیگر ممالک میں دہشت گردی کی کارروائیوں میں ملوث رہا ہے اور قتل کی مہم کا جشن مناتا ہے جب کہ پاکستان کے علاوہ کسی نے بھی دہشت گردی کی جنگ میں اتنی قربانیاں نہیں دی ہیں۔
انہوں نے کہا کہ پاکستان نے 80 ہزار سے زائد قیمتی جانوں کی قربانی دی، اور 150 ارب ڈالر سے زائد معاشی نقصانات کا سامنا کیا جب کہ مجموعی طور پر پاکستان کو جو نقصان اٹھانا پڑا، وہ 500 ارب ڈالر کے قریب ہے۔
ان کا کہنا تھا کہ پاکستان عالمی کمیونٹی کے ساتھ مل کر دہشت گردی کے اس مشترکہ خطرے سے نمٹنے کے لیے بھرپور کوششیں کر رہا ہے۔
نائب وزیراعظم نے کہا کہ پاکستان ہمیشہ سے بھارتی منصوبہ بندی، سازش اور سرپرستی میں کی گئی دہشت گردی کا شکار رہا ہے اور اس پس منظر میں یہ ’مضحکہ خیز ہے کہ پاکستان کو پہلگام واقعے سے کسی قسم کے تعلق کا الزام لگایا جائے‘۔
ان کا کہنا تھا کہ بھارت دیگر ممالک پر انگلی اٹھانے کے بجائے اپنے اندرونی معاملات پر توجہ دے، بھارت میں ہمیشہ ایسے واقعات تب ہوتے ہیں جب وہاں کوئی عالمی شخصیت دورہ کررہی ہوتی ہے۔
ڈی جی آئی ایس پی آر لیفٹننٹ جنرل احمد شریف چوہدری، نائب وزیراعظم اسحاق ڈار اور ترجمان دفتر خارجہ شفقت علی خان کی پریس کانفرنس ابھی جاری ہے
