وانا (خیبرپختونخوا) — مقامی سیکیورٹی ذرائع کے مطابق آج صبح کیڈٹ کالج وانا کے مرکزی داخلی دروازے پر خودکش دھماکہ ہوا۔ سیکیورٹی فورسز نے بروقت کارروائی کرتے ہوئے کالج کے اندر داخل ہونے کی کوشش ناکام بنا دی اور مبینہ طور پر 4 سے 5 حملہ آور مارے گئے۔ آپریشن فی الحال جاری ہے اور سیکیورٹی اہلکار علاقے میں کلیئرنس اور تلاشی آپریشن کر رہے ہیں۔
ذرائع نے بتایا کہ حملہ آوروں کی کوشش تھی کہ ماضی کے المناک واقعات جیسا بڑا حملہ دہرایا جائے، مگر سیکیورٹی فورسز کی بروقت کاروائی نے اس کو ناکام بنایا۔ کیڈٹ کالج وانا ایک مقامی قبائل کی درخواست پر قائم کیا گیا ادارہ ہے جہاں محسود اور وزیر قبائل سمیت علاقے کے نوجوان اعلیٰ معیار کی تعلیم حاصل کر رہے ہیں۔ کالج کے فارغ التحصیل کئی طلبہ ملک کی مختلف سرکاری خدمات میں خدمات انجام دے رہے ہیں۔
سیکیورٹی ذرائع کا کہنا ہے کہ آپریشن کے دوران علاقے کو محاصرہ کر کے مکمل کلیئرنس کی کوشش کی جا رہی ہے۔ صوبائی حکومت اور متعلقہ اداروں کی جانب سے واقعے کی مزید تفصیلات جاری ہونے پر تازہ معلومات فراہم کی جائیں گی۔
