دبئی – دبئی ایئر شو میں بھارتی فضائیہ کو ایک بار پھر خفت کا سامنا کرنا پڑا جہاں اس کا لڑاکا طیارہ تیجس فضائی مظاہرے کے دوران گر کر تباہ ہوگیا۔ حادثہ اس وقت پیش آیا جب طیارہ دوپہر مقامی وقت کے مطابق 2 بج کر 10 منٹ پر ہزاروں تماشائیوں کے سامنے ایروبیٹک ڈسپلے کر رہا تھا۔
بھارتی میڈیا کے مطابق تیجس طیارہ سہ پہر کے وقت فلائنگ ڈسپلے کے دوران تکنیکی نقائص کے باعث گر کر تباہ ہوا، جس کے نتیجے میں پائلٹ جان کی بازی ہار گیا۔
بھارتی ایئر چیف نے حادثے کے بعد اپنے بیان میں کہا کہ دفاعی منصوبوں میں غیر ضروری معاہدے اور غیر حقیقی سسٹمز شامل کیے جاتے رہے ہیں، جس سے تکنیکی مسائل بڑھتے ہیں۔ ان کے مطابق “آپریشن سندور بھارت” حالیہ دفاعی قیادت کے لیے ایک واضح سبق ہے کہ بروقت اور جامع ٹیکنالوجی اپ گریڈ نہ ہونے سے سنگین نتائج سامنے آسکتے ہیں۔
رپورٹس کے مطابق دبئی ایئر شو میں حادثے کا شکار ہونے والا طیارہ بھارتی دفاعی نظام میں موجود کئی نقائص کا عکاس ہے۔ ایئر چیف اے پی سنگھ اس سے قبل بھی دفاعی معاہدوں میں بدعنوانی اور پروجیکٹس میں غیر معیاری ٹائم لائنز کی نشاندہی کر چکے ہیں۔ ان کا کہنا تھا کہ بھارت میں کوئی دفاعی منصوبہ وقت پر مکمل نہیں ہوتا، جس کے باعث فضائیہ کو شدید چیلنجز کا سامنا ہے۔
بھارتی فضائیہ (آئی اے ایف) نے سوشل میڈیا پلیٹ فارم ایکس پر حادثے کی تصدیق کرتے ہوئے بتایا کہ طیارے کا پائلٹ شدید زخمی ہوا اور بعد ازاں زخموں کی تاب نہ لاتے ہوئے ہلاک ہوگیا۔ آئی اے ایف نے اپنے بیان میں افسوس کا اظہار کرتے ہوئے کہا کہ وہ غمزدہ خاندان کے ساتھ کھڑے ہیں۔
فضائیہ کے مطابق حادثے کی وجوہات معلوم کرنے کے لیے کورٹ آف انکوائری تشکیل دی جا رہی ہے، جو تکنیکی یا ممکنہ آپریشنل خرابیوں کا جامع جائزہ لے گی۔
دبئی ایئر شو میں ہونے والا یہ واقعہ بھارتی فضائیہ کے تیجس پروگرام کی کارکردگی اور تکنیکی معیار سے متعلق نئے سوالات کھڑے کر رہا ہے۔
تیجس فائٹر جیٹ کے اہم حقائق:
– تیجس ایک سنگل سیٹ لڑاکا طیارہ ہے، جبکہ اس کی ٹرینر اور نیول ویرینٹس بھی استعمال میں ہیں۔
– اس کی پہلی آزمائشی پرواز 2001 میں ہوئی جبکہ ابتدائی آپریشنل کلیئرنس کے تحت پروڈکشن ماڈل کی پہلی پرواز 22 مارچ 2016 کو کی گئی۔
– طیارہ 4,000 کلوگرام تک پے لوڈ اٹھانے کی صلاحیت رکھتا ہے اور 13,300 کلوگرام زیادہ سے زیادہ ٹیک آف وزن کے ساتھ اڑان بھر سکتا ہے۔
– 4.5 جنریشن ملٹی رول طیارہ ہونے کے ناطے یہ فضائی اور زمینی کارروائیوں میں معاونت فراہم کرتا ہے۔
– 2016 میں آئی اے ایف کے اسکواڈرن نمبر 45 "فلائنگ ڈیگرز” نے اسے اپنے بیڑے میں شامل کیا۔
– اپنی کلاس میں یہ دنیا کا سب سے چھوٹا اور ہلکا لڑاکا طیارہ سمجھا جاتا ہے، جس کی ہلکی ساخت اس کی کارکردگی میں اہم کردار ادا کرتی ہے۔
– بھارت نے حال ہی میں فضائیہ کے لیے 97 مزید تیجس مارک 1 اے طیاروں کی خریداری کی منظوری دی ہے، جسے "میک ان انڈیا” پروگرام کے لیے ایک بڑی پیش رفت قرار دیا جا رہا ہے۔
