کیف – یوکرین کے صدر ولادیمیر زیلنسکی نے کہا کہ یوکرین نے تقریباً چار سال پرانی جنگ کے مجموعی تصفیے کے اقدامات کے سلسلے میں امریکی صدر ڈونلڈ ٹرمپ کے داماد جیرڈ کشنر اور دیگر اعلیٰ امریکی حکام کے ساتھ بات چیت میں تعمیر نو کے منصوبے کے اہم نکات پر اتفاق کیا ہے۔
زیلنسکی نے بتایا کہ وہ کشنر، ٹریژری سکریٹری سکاٹ بیسنٹ اور بلیک راک کے سی ای او لیری فنک کے ساتھ ایک اجلاس میں معاشی دستاویز پر توجہ مرکوز کرتے ہوئے بات چیت کر رہے تھے۔
انہوں نے کہا کہ معاشی دستاویز کے اصول واضح ہیں اور یوکرین مکمل طور پر امریکی فریق کے ساتھ منسلک ہے۔ زیلنسکی نے مزید کہا "تعمیر نو کے لیے اعلیٰ معیار ضروری ہے تاکہ جنگ کے بعد اقتصادی ترقی مضبوط بنیاد پر ہو۔ حقیقی سلامتی بنیادی شرط ہے؛ جب سیکیورٹی ہوگی تو باقی سب کچھ ممکن ہوگا۔”
زیلنسکی نے وزیر اعظم یولیا سویریڈینکو، دیگر حکام اور اعلیٰ فوجی افسران کے ساتھ ملاقات میں جنگ کے خاتمے کے لیے 20 نکات پر مشتمل بنیادی دستاویز پر کام جاری رکھنے کا اعلان کیا۔
کشنر نے یوکرین اور روس کے درمیان امن تصفیہ کے لیے اہم کردار ادا کیا ہے، جس میں پچھلے ہفتے کریملن میں روسی صدر ولادیمیر پوٹن کے ساتھ پانچ گھنٹے کی بات چیت شامل تھی۔ کشنر نے غزہ میں جنگ بندی اور تعمیر نو کے منصوبوں میں بھی سرگرم کردار ادا کیا تھا۔
یوکرین کی تعمیر نو میں نایاب دھاتوں سمیت سرمایہ کاری کے فنڈ کے قیام کو اہم نکتہ قرار دیا گیا، جس میں سویریڈینکو نے کلیدی کردار ادا کیا۔
برطانیہ، فرانس اور جرمنی کے رہنماؤں نے بھی بدھ کو ٹرمپ کے ساتھ یوکرین میں جنگ کے خاتمے کے لیے واشنگٹن کی تازہ ترین امن کوششوں پر بات چیت کی، اور یورپی یونین کے رکن ممالک کی قیادت میں یوکرین کی حمایت کرنے والے ممالک کے "کولیشن آف دی ولنگ” گروپ کے ارکان جمعرات کو اجلاس کرنے والے ہیں۔
About The Author
