امریکی صدر Donald Trump نے ایران کے ساتھ جاری کشیدگی کے تناظر میں خبردار کیا ہے کہ اگر بدھ تک کوئی طویل مدتی معاہدہ طے نہ پایا تو جنگ بندی ختم کی جا سکتی ہے۔
غیر ملکی میڈیا رپورٹس کے مطابق صدر ٹرمپ نے ایئر فورس ون میں صحافیوں سے گفتگو کرتے ہوئے کہا کہ وہ ممکنہ طور پر جنگ بندی میں توسیع نہیں کریں گے، تاہم ایرانی بندرگاہوں پر عائد ناکہ بندی بدستور برقرار رہے گی۔ ان کا کہنا تھا کہ اگر مذاکرات ناکام ہوئے تو صورتحال دوبارہ سنگین ہو سکتی ہے اور بمباری کا سلسلہ بھی شروع کیا جا سکتا ہے۔
صدر ٹرمپ نے دعویٰ کیا کہ ایران کے ساتھ کئی معاملات پر پہلے ہی پیش رفت ہو چکی ہے اور مذاکرات درست سمت میں آگے بڑھ رہے ہیں۔ انہوں نے کہا کہ ان کے نمائندے مسلسل بات چیت میں مصروف ہیں، تاہم حتمی فیصلہ وہ خود کریں گے۔
امریکی صدر کے مطابق آبنائے ہرمز میں امریکی ناکہ بندی مؤثر انداز میں جاری ہے اور اس حکمت عملی کے ذریعے ایران پر دباؤ برقرار رکھا جا رہا ہے۔ انہوں نے یہ بھی کہا کہ ایرانی قیادت اپنے عوام کو مطمئن کرنے کے لیے مختلف بیانات دے رہی ہے، جبکہ امریکا واضح اور دوٹوک مؤقف اختیار کیے ہوئے ہے۔
دوسری جانب برطانوی میڈیا رپورٹس کے مطابق صدر ٹرمپ ہفتے کے روز ایک اہم پریس کانفرنس کرنے جا رہے ہیں، جس میں اگرچہ ایران براہ راست موضوع نہیں ہوگا، تاہم امکان ہے کہ اس حوالے سے سوالات اٹھائے جائیں گے۔
امریکی صدر نے مزید بتایا کہ وائٹ ہاؤس میں ایک اہم اور بااثر شخصیت کی آمد متوقع ہے، جو اپنے ملک اور عالمی امور میں گہری دلچسپی رکھتی ہے، تاہم اس شخصیت کی شناخت ظاہر نہیں کی گئی۔
About The Author
