امریکا کے قریبی تعلقات اب برطانیہ نہیں بلکہ اسرائیل سے ہیں، برطانوی سفیر کا لیک آڈیو میں دعویٰ -

امریکا میں تعینات برطانوی سفیر سر کرسچن ٹرنر کا کہنا ہے کہ موجودہ عالمی حالات میں امریکا کے سب سے قریبی تعلقات برطانیہ کے بجائے اسرائیل کے ساتھ ہیں۔

برطانوی اخبار فنانشل ٹائمز کی رپورٹ کے مطابق یہ انکشاف ایک لیک ہونے والی آڈیو میں سامنے آیا، جس میں سفیر نے امریکا اور برطانیہ کے تعلقات پر کھل کر بات کی۔

سر کرسچن ٹرنر نے کہا کہ اگرچہ امریکا اور برطانیہ کے درمیان دفاع، معیشت اور دیگر شعبوں میں قریبی تعاون موجود ہے، تاہم بدلتے ہوئے عالمی حالات کے باعث یہ تعلق اب نئی شکل اختیار کر رہا ہے اور ماضی جیسا نہیں رہا۔

انہوں نے مزید کہا کہ یورپ اب مکمل طور پر امریکا کے سکیورٹی نظام پر انحصار نہیں کر سکتا اور مغربی اتحادی ممالک کو اپنی ذمہ داریوں اور تعلقات کا ازسرنو جائزہ لینا ہوگا۔

سفیر کے مطابق اس وقت امریکا کا “خاص تعلق” صرف ایک ملک کے ساتھ ہے اور وہ اسرائیل ہے، جو خطے میں واشنگٹن کی پالیسیوں کا مرکزی ستون بن چکا ہے۔

دوسری جانب برطانوی دفتر خارجہ نے اس بیان سے لاتعلقی کا اظہار کرتے ہوئے واضح کیا ہے کہ یہ سفیر کی ذاتی رائے ہے اور اسے حکومت کی سرکاری پالیسی نہیں سمجھا جانا چاہیے۔