فٹبال کے میدان میں خوابوں کی نئی اُڑان: پاکستان اسٹریٹ چائلڈ فٹبال ٹیم ورلڈ کپ کے لیے تیار -

اسلام آباد: پاکستان کی اسٹریٹ چائلڈ فٹبال ٹیم 2 مئی 2026 کو Mexico روانہ ہوگی، جہاں وہ Street Child Football World Cup میں شرکت کر کے ملک کی نمائندگی کرے گی۔ یہ پاکستان کی اس عالمی ٹورنامنٹ میں چوتھی شرکت ہوگی، جس کے لیے Muslim Hands اور Prime Minister Youth Programme کا تعاون حاصل ہے۔

اس موقع پر رہان طاہر نے کہا کہ یہ اقدام نوجوانوں کو بااختیار بنانے اور سماجی مسائل کو اجاگر کرنے کی ایک منظم کوشش ہے۔ ان کا کہنا تھا، “ہماری کوشش ہے کہ کھیل سے وابستہ بچوں کو قومی، علاقائی اور عالمی سطح پر مواقع فراہم کیے جائیں اور انہیں ان کے بنیادی حقوق جیسے خواب دیکھنے، کھیلنے، تعلیم حاصل کرنے اور شناخت کے حق تک رسائی دی جائے۔”

Prime Minister Youth Programme اور Muslim Hands کے اشتراک سے ٹیم کو سپورٹ فراہم کی جا رہی ہے تاکہ دنیا بھر میں پاکستان کے اسٹریٹ بچوں کو درپیش چیلنجز کو اجاگر کیا جا سکے اور ان کے لیے تعلیم، تحفظ اور بہتر مواقع کی اہمیت کو اجاگر کیا جا سکے۔

پاکستان کی نمائندگی کرنے والے 10 کھلاڑیوں میں عبداللہ، مبشر شاہ، محمد حماد، ندیم حسین، محمد مصطفیٰ، محمد عیسیٰ، شاہد انجم، محمد کاشف، محمد بلال اور محمد ابراہیم شامل ہیں، جن کا تعلق ملک کے مختلف علاقوں سے ہے۔

واضح رہے کہ پاکستان اس ٹورنامنٹ میں اس سے قبل بھی نمایاں کارکردگی دکھا چکا ہے، جہاں ٹیم نے روس اور قطر میں ہونے والے ورلڈ کپ میں دوسری پوزیشن جبکہ برازیل میں تیسری پوزیشن حاصل کی، جس سے پاکستان کو عالمی سطح پر پہچان ملی۔

ٹیم کی میکسیکو آمد پر اوورسیز پاکستانی کمیونٹی کے اراکین، جن میں حمزہ ارشد اور عثمان انصاری شامل ہیں، ان کا پرتپاک استقبال کریں گے۔

منتظمین کے مطابق یہ اقدام محض فٹبال تک محدود نہیں بلکہ اس کا مقصد اسٹریٹ بچوں کو شناخت، مواقع اور اپنی آواز بلند کرنے کا پلیٹ فارم فراہم کرنا ہے۔ یہ ٹیم نہ صرف پاکستان کی نمائندگی کرتی ہے بلکہ یہ پیغام بھی دیتی ہے کہ ہر بچہ مواقع اور حقوق کا حقدار ہے اور کھیل ان کی صلاحیتوں کو عالمی سطح پر اجاگر کرنے کا مؤثر ذریعہ بن سکتا ہے۔