امریکی صدر ڈونلڈ ٹرمپ نے ایک بار پھر ایران پر جوہری مذاکرات کے لیے زور دیتے ہوئے سخت اور دھمکی آمیز لہجہ اختیار کیا ہے۔
اپنے سوشل میڈیا پلیٹ فارم Truth Social پر جاری بیان میں صدر ٹرمپ نے ایرانی قیادت کو مخاطب کرتے ہوئے کہا کہ وہ فوری طور پر “ہوش کے ناخن لیں” اور حالات کو مزید بگڑنے سے بچائیں۔
ٹرمپ نے لکھا کہ ایران موجودہ صورتحال کو سنبھالنے میں ناکام ہے اور اسے جوہری ہتھیاروں سے پاک معاہدوں کی نوعیت کا بھی درست ادراک نہیں۔ انہوں نے خبردار کیا کہ دانشمندی اسی میں ہے کہ ایران فوری طور پر مذاکرات کی جانب آئے۔
امریکی صدر نے اپنے بیان کے ساتھ ایک تصویر بھی شیئر کی جس میں وہ بندوق تھامے ہوئے نظر آتے ہیں اور اس پر لکھا تھا “اب مزید نہیں، اچھے ساتھی”، جسے مبصرین نے ایک واضح سیاسی پیغام قرار دیا ہے۔
یاد رہے کہ امریکا اور اسرائیل نے 28 فروری کو ایران کے خلاف فضائی کارروائیاں شروع کی تھیں، جس کے بعد خطے میں کشیدگی میں مسلسل اضافہ ہوا۔ بعد ازاں پاکستان کی ثالثی میں جنگ بندی پر پیش رفت ہوئی، تاہم عملی طور پر تناؤ اب بھی برقرار ہے۔
دوسری جانب آبنائے ہرمز کی صورتحال بھی عالمی تشویش کا باعث بنی ہوئی ہے، جہاں ایران نے بعض تجارتی جہازوں کی آمدورفت محدود کر دی ہے جبکہ امریکا نے بحری ناکہ بندی ختم کرنے سے انکار کیا ہے، جس کے باعث عالمی تیل و گیس مارکیٹ پر دباؤ بڑھ رہا ہے۔
About The Author
