معاشی استحکام کیلئے کیپٹل مارکیٹ کا مضبوط ہونا ناگزیر ہے: وزیر خزانہ

اسلام آباد میں کیپٹل مارکیٹ ڈویلپمنٹ فنڈ کی تقریب سے خطاب کرتے ہوئے محمد اورنگزیب کا کہنا تھا کہ حکومت کا بنیادی فوکس کرنٹ اکاؤنٹ کے استحکام پر ہے اور مالیاتی نظم و ضبط کو ہر صورت یقینی بنایا جائے گا۔

انہوں نے کہا کہ حکومت عالمی مالیاتی اداروں کے ساتھ تعاون کو مزید فروغ دے کر مالیاتی نظام کو مستحکم بنانا چاہتی ہے، توانائی کے شعبے میں بھی اصلاحات جاری ہیں اور سولر، ونڈ اور ہائیڈرو پاور کے ذریعے توانائی کے حصول پر خصوصی توجہ دی جا رہی ہے۔

محمد اورنگزیب نے اس عزم کا اعادہ کیا کہ حکومت مالی نظم و ضبط، اقتصادی استحکام اور نجی شعبے کے فروغ کو اپنی اولین ترجیحات میں شامل رکھے گی۔

انہوں نے خطے کی صورتحال پر تشویش کا اظہار کرتے ہوئے کہا کہ دعا ہے کہ امریکا اور ایران کے درمیان جاری تنازع جلد ختم ہو تاکہ عالمی معیشت پر منفی اثرات کم کیے جا سکیں۔

محمد اورنگزیب نے کہا کہ پاکستان کی قیادت خطے میں کشیدگی کے خاتمے کیلئے فعال کردار ادا کر رہی ہے، تاہم موجودہ صورتحال کے پیش نظر محتاط اور متوازن حکمت عملی اختیار کرنا ناگزیر ہے۔

انہوں نے کہا کہ حکومت کی توجہ کرنٹ اکاؤنٹ اور مالی خسارے کو کنٹرول کرنے پر مرکوز ہے جبکہ معاشی اشاریوں میں بتدریج بہتری آ رہی ہے، مشکل حالات کے باوجود ملکی معیشت درست سمت میں آگے بڑھ رہی ہے۔

وزیر خزانہ نے زور دیا کہ معاشی ترقی کیلئے کیپٹل مارکیٹ کا کردار نہایت اہم ہے اور چیلنجز کے باوجود پاکستان سٹاک مارکیٹ نے استحکام کا مظاہرہ کیا ہے، علاقائی کشیدگی پاکستان کیلئے ایک اہم سبق ہے کہ معیشت کو بیرونی جھٹکوں سے محفوظ بنایا جائے۔

انہوں نے کہا کہ توانائی کے متبادل ذرائع کی جانب فوری منتقلی وقت کی ضرورت ہے اور اپنی ضروریات کیلئے خود انحصاری ناگزیر ہو چکی ہے، کمرشل فیصلے آزادانہ اور قومی مفاد کے مطابق کیے جانے چاہئیں۔

محمد اورنگزیب کا کہنا تھا کہ ملکی وسائل سے سرمایہ اکٹھا کرنے پر خصوصی توجہ دی جا رہی ہے اور خود انحصاری ہی معاشی استحکام کا اصل راستہ ہے،سٹاک اور کیپٹل مارکیٹ خود انحصاری کے حصول میں کلیدی کردار ادا کر سکتی ہے۔

وفاقی وزیر خزانہ نے مزید کہا کہ ملکی ترقی کیلئے مقامی سرمایہ کاری کو فروغ دینا ہوگا اور سرمایہ کاروں کو اپنے ہی ملک میں سرمایہ لگانے کی ترغیب دینا ضروری ہے، قومی معیشت کے استحکام کیلئے داخلی وسائل پر انحصار بڑھانا وقت کی اہم ضرورت ہے۔