زیورخ: عالمی فٹ بال تنظیم FIFA نے اعلان کیا ہے کہ FIFA World Cup 2026 میں شریک 48 ٹیموں کے حتمی اسکواڈز کی باضابطہ منظوری 2 جون 2026 کو دی جائے گی، جس کے بعد تمام ٹیموں کی فہرستیں سرکاری طور پر جاری تصور ہوں گی۔
میڈیا رپورٹس کے مطابق ہر ٹیم کو 26 کھلاڑیوں پر مشتمل اسکواڈ رکھنے کی اجازت ہوگی، جو 2022 ورلڈ کپ کے فارمیٹ کے مطابق برقرار رکھی گئی ہے۔ فیفا قوانین کے تحت ابتدائی مرحلے میں تمام ٹیمیں 35 سے 55 کھلاڑیوں پر مشتمل ایک عارضی فہرست جمع کرائیں گی، جس میں کم از کم 4 گول کیپرز شامل کرنا لازمی ہوگا۔
یہ ابتدائی فہرست صرف اندرونی استعمال کے لیے ہوگی اور اسے عوامی سطح پر جاری نہیں کیا جائے گا۔ بعد ازاں ٹیمیں 23 سے 26 کھلاڑیوں پر مشتمل اپنا حتمی اسکواڈ پیش کریں گی، جس میں کم از کم 3 گول کیپرز کی شمولیت ضروری ہوگی۔
فیفا کے قواعد کے مطابق اگر کسی کھلاڑی کو شدید چوٹ یا بیماری لاحق ہو جائے تو ٹیم اپنے پہلے میچ سے 24 گھنٹے قبل تک عارضی فہرست میں شامل کسی بھی کھلاڑی کو اس کی جگہ شامل کر سکتی ہے۔ مزید برآں، گول کیپر کو ٹورنامنٹ کے دوران بھی تبدیل کرنے کی اجازت ہوگی، بشرطیکہ متبادل کھلاڑی ابتدائی فہرست میں شامل ہو۔
فیفا کا کہنا ہے کہ قومی ٹیمیں اپنے اسکواڈز کا اعلان کسی بھی وقت کر سکتی ہیں، تاہم انہیں حتمی حیثیت اس وقت تک حاصل نہیں ہوگی جب تک 2 جون کو فیفا کی جانب سے باضابطہ منظوری نہ دی جائے۔
کھلاڑیوں کی دستیابی کو یقینی بنانے کے لیے 25 مئی 2026 سے ریلیز اور تیاری کا مرحلہ شروع ہوگا، جو ہر کھلاڑی کے اپنے کلب کے آخری میچ کے اگلے دن سے نافذ ہوگا۔ بعض مخصوص حالات میں، کنفیڈریشن کلب فائنلز میں شریک کھلاڑیوں کو 30 مئی تک رعایت دی جا سکتی ہے، جس کے لیے فیفا کی پیشگی منظوری ضروری ہوگی۔
یہ نیا شیڈول ٹیموں کو بہتر تیاری کا موقع فراہم کرے گا، جبکہ شائقین کو عالمی کپ سے قبل مکمل اسکواڈز کے باضابطہ اعلان کا انتظار رہے گا۔
About The Author
