سلہٹ ٹیسٹ کے چوتھے روز کے اختتام تک پاکستان نے بنگلادیش کے خلاف 437 رنز کے ہدف کے تعاقب میں 7 وکٹوں کے نقصان پر 316 رنز بنا لیے ہیں، جبکہ قومی ٹیم کو کامیابی کے لیے اب مزید 121 رنز درکار ہیں۔
میچ کے چوتھے روز پاکستان نے اپنی دوسری اننگز کا آغاز بغیر کسی نقصان کے کیا، تاہم پہلی وکٹ 27 رنز پر گر گئی جب عبداللّٰہ فضل صرف 6 رنز بنا کر پویلین لوٹ گئے۔
پاکستان کی دوسری وکٹ 41 رنز پر گری، اذان اویس 21 رنز بنا کر آؤٹ ہوئے۔ ابتدائی دو وکٹیں جلد گرنے کے بعد کپتان شان مسعود اور بابر اعظم نے ٹیم کو سنبھالا اور ذمہ دارانہ بیٹنگ کا مظاہرہ کیا۔
دونوں بیٹرز نے تیسری وکٹ کے لیے اہم شراکت قائم کرتے ہوئے اسکور 133 تک پہنچایا، جہاں بابر اعظم 47 رنز بنا کر آؤٹ ہوگئے۔ ان کے بعد سعود شکیل بھی زیادہ دیر کریز پر نہ ٹھہر سکے اور صرف 6 رنز بنا کر واپس لوٹ گئے۔
قومی ٹیم کو ایک اور دھچکا اس وقت لگا جب کپتان شان مسعود 71 رنز کی عمدہ اننگز کھیلنے کے بعد آؤٹ ہوگئے۔ تاہم اس کے بعد سلمان علی آغا اور محمد رضوان نے شاندار مزاحمت کرتے ہوئے پاکستان کو میچ میں دوبارہ مضبوط پوزیشن میں لے آئے۔
دونوں کھلاڑیوں نے چھٹی وکٹ کے لیے قیمتی شراکت قائم کی اور ٹیم کا مجموعہ 296 رنز تک پہنچایا۔ سلمان علی آغا 71 رنز بنا کر آؤٹ ہوئے جبکہ دن کے آخری آؤٹ ہونے والے کھلاڑی حسن علی تھے جو بغیر کوئی رن بنائے پویلین واپس گئے۔
چوتھے روز کھیل کے اختتام پر محمد رضوان 75 اور ساجد خان 8 رنز کے ساتھ وکٹ پر موجود ہیں۔
بنگلادیش کی جانب سے ناہید رانا اور تیج الاسلام نے دو، دو جبکہ مہدی حسن میراز نے ایک وکٹ حاصل کی۔
واضح رہے کہ پاکستان پہلی اننگز میں 232 رنز پر آؤٹ ہوگیا تھا جبکہ بنگلادیش نے پہلی اننگز میں 278 اور دوسری اننگز میں 390 رنز اسکور کیے تھے۔
About The Author
