سلہٹ ٹیسٹ میں بھی پاکستان ناکام، بنگلادیش نے ٹیسٹ سیریز 2-0 سے جیت لی -

پاکستان بمقابلہ بنگلادیش ٹیسٹ سیریز 2026 کے دوسرے اور آخری ٹیسٹ میں بنگلادیش قومی کرکٹ ٹیم نے پاکستان قومی کرکٹ ٹیم کو 78 رنز سے شکست دے کر دو میچز کی سیریز میں کلین سوئپ مکمل کر لیا۔

سلہٹ میں کھیلے گئے میچ میں بنگلادیش کی جانب سے دیے گئے 437 رنز کے ہدف کے تعاقب میں پاکستان کی پوری ٹیم 358 رنز پر آؤٹ ہوگئی۔

پاکستان کی جانب سے محمد رضوان 94 رنز بنا کر نمایاں رہے جبکہ کپتان شان مسعود اور سلمان علی آغا نے 71، 71 رنز کی ذمہ دارانہ اننگز کھیلیں۔

بابر اعظم نے 47 جبکہ ساجد خان نے 28 رنز اسکور کیے، تاہم دیگر بیٹرز خاطر خواہ کارکردگی نہ دکھا سکے۔

بنگلادیش کی جانب سے تیج الاسلام نے شاندار بولنگ کرتے ہوئے 6 وکٹیں حاصل کیں، جبکہ ناہید رانا نے 2 کھلاڑیوں کو آؤٹ کیا۔ شرف الاسلام اور مہدی حسن میراز نے ایک، ایک وکٹ حاصل کی۔

میچ میں بنگلادیش نے پہلی اننگز میں 278 اور دوسری اننگز میں 390 رنز بنائے، جبکہ پاکستان پہلی اننگز میں 232 اور دوسری اننگز میں 358 رنز بنا سکا۔

بنگلادیش کے لٹن داس کو پلیئر آف دی میچ جبکہ مشفق الرحیم کو پلیئر آف دی سیریز قرار دیا گیا۔

میچ کے بعد گفتگو کرتے ہوئے پاکستانی کپتان شان مسعود نے کہا کہ ٹیم نے بہت غلطیاں کیں اور ٹیسٹ کرکٹ میں غلطیوں کی سزا ضرور ملتی ہے۔ انہوں نے کہا کہ ٹیسٹ میچ میں پورے پانچ دن تسلسل کے ساتھ معیاری کھیل پیش کرنا ضروری ہوتا ہے۔