دہلی کی حکومت نے عیدالاضحیٰ سے قبل جانوروں کی قربانی سے متعلق سخت ہدایات جاری کرتے ہوئے گائے، بچھڑے، اونٹ اور بعض دیگر جانوروں کے ذبیحے کو غیر قانونی قرار دے دیا ہے۔
بھارتی میڈیا رپورٹس کے مطابق دہلی حکومت نے خبردار کیا ہے کہ مقررہ قوانین کی خلاف ورزی کرنے والوں کے خلاف فوجداری مقدمات درج کیے جائیں گے جبکہ غیر قانونی قربانی، جانوروں کی نقل و حمل اور خرید و فروخت کے خلاف خصوصی نگرانی بھی کی جائے گی۔
دہلی کے ترقیاتی وزیر Kapil Mishra کی جانب سے جاری ہدایت نامے میں کہا گیا ہے کہ سڑکوں، گلیوں اور عوامی مقامات پر قربانی کی اجازت نہیں ہو گی اور قربانی صرف حکومت سے منظور شدہ مقامات پر ہی کی جا سکے گی۔
ہدایت نامے میں یہ بھی واضح کیا گیا کہ قربانی کے فضلے کو نالوں، سیوریج لائنوں یا عوامی مقامات پر پھینکنے پر پابندی عائد ہو گی جبکہ متعلقہ اداروں کو صفائی اور نگرانی کے خصوصی انتظامات کرنے کی ہدایت دی گئی ہے۔
دہلی حکومت کے مطابق موجودہ قوانین کے تحت اونٹ کے ذبیحے پر بھی پابندی ہے جبکہ Delhi Agricultural Cattle Preservation Act 1994 کے تحت گائے اور بچھڑے کے ذبیحے پر پہلے ہی مکمل پابندی نافذ ہے۔
یہ ہدایات تمام ضلعی مجسٹریٹس، پولیس حکام اور میونسپل اداروں کو ارسال کر دی گئی ہیں تاکہ عیدالاضحیٰ کے دوران قوانین پر سختی سے عمل درآمد یقینی بنایا جا سکے۔
About The Author
