سعودی عرب اور لبنان کے تعلقات میں اہم پیش رفت، لبنانی برآمدات دوبارہ شروع کرنے کا فیصلہ -

سعودی عرب کے ولی عہد اور وزیر اعظم محمد بن سلمان نے لبنان سے برآمدات دوبارہ شروع کرنے کی ہدایت جاری کر دی ہے، جسے دونوں ممالک کے تعلقات میں ایک اہم پیش رفت قرار دیا جا رہا ہے۔

سعودی خبر رساں ایجنسی کے مطابق Faisal bin Farhan Al Saud نے لبنانی وزیر اعظم Nawaf Salam سے ٹیلی فونک رابطہ کیا اور انہیں اس فیصلے سے آگاہ کیا۔

رپورٹ کے مطابق لبنان سے برآمدات کی بحالی کا فیصلہ لبنانی صدر اور وزیر اعظم کی درخواست پر کیا گیا۔ سعودی حکام نے اس اقدام کی بنیاد لبنانی حکومت کی جانب سے ریاستی اداروں کی بحالی کے لیے کیے گئے اقدامات، گزشتہ ایک سال کے دوران مشترکہ ٹیموں کی کاوشوں، سعودی عرب کے ساتھ تعاون اور فراہم کی گئی یقین دہانیوں کو قرار دیا ہے۔

ٹیلی فونک گفتگو کے دوران سعودی وزیر خارجہ نے لبنان کے استحکام، خودمختاری اور لبنانی عوام کی خوشحالی کے لیے سعودی عرب کی مکمل حمایت کا اعادہ کیا۔ انہوں نے اس امید کا بھی اظہار کیا کہ لبنانی قیادت ایسے تمام ضروری اقدامات کرے گی جن سے لبنان کی سرزمین کو کسی ایسے مقصد کے لیے استعمال ہونے سے روکا جا سکے جو برادر ممالک کے مفادات کے خلاف ہو۔

دوسری جانب لبنانی وزیر اعظم ڈاکٹر نواف سلام نے سعودی ولی عہد شہزادہ محمد بن سلمان کا شکریہ ادا کرتے ہوئے فیصلے کا خیرمقدم کیا اور اسے دونوں ممالک کے درمیان تعلقات کو مزید مضبوط بنانے کی جانب مثبت قدم قرار دیا۔