یران کی وزارت خارجہ کے ترجمان اسماعیل بقائی نے جاری مذاکرات کے حوالے سے اہم بیان دیتے ہوئے کہا ہے کہ مجوزہ معاہدے کے متن کے بڑے حصوں کو حتمی شکل دے دی گئی ہے، تاہم ایران اپنے بنیادی قومی مفادات اور سرخ لکیروں پر کسی قسم کا سمجھوتہ نہیں کرے گا۔
ایرانی میڈیا کے مطابق اسماعیل بقائی نے کہا کہ مذاکرات میں قابلِ ذکر پیش رفت ہوئی ہے اور متعدد اہم نکات پر اتفاقِ رائے پیدا ہو چکا ہے، لیکن ابھی تک کسی حتمی نتیجے پر نہیں پہنچا گیا۔
انہوں نے واضح کیا کہ یہ ایک انتہائی حساس اور اہم معاملہ ہے جس کا جائزہ اس وقت متعلقہ فیصلہ ساز ادارے لے رہے ہیں۔ ان کا کہنا تھا کہ تمام پہلوؤں کا باریک بینی سے جائزہ لینے کے بعد ہی حتمی فیصلہ کیا جائے گا۔
ترجمان وزارت خارجہ نے اس بات پر زور دیا کہ ایران مذاکراتی عمل کو سنجیدگی سے آگے بڑھا رہا ہے، تاہم قومی خودمختاری، سلامتی اور بنیادی اصولوں سے متعلق معاملات پر تہران کا مؤقف تبدیل نہیں ہوگا۔
اسماعیل بقائی کے بیان کو ایسے وقت میں اہم قرار دیا جا رہا ہے جب ایران اور امریکا کے درمیان ممکنہ معاہدے سے متعلق مختلف سفارتی ذرائع پیش رفت کی اطلاعات دے رہے ہیں اور خطے میں کشیدگی کم کرنے کے لیے متعدد ممالک سفارتی کوششوں میں مصروف ہیں۔
About The Author
