اسرائیل اور حزب اللہ کے درمیان جنگ بندی کے اعلان کے باوجود جنوبی لبنان میں اسرائیلی فضائی حملے رپورٹ ہوئے ہیں، جس نے معاہدے کے فوری نفاذ اور اس کی عملی صورتحال پر سوالات اٹھا دیے ہیں۔
لبنان کی سرکاری نیشنل نیوز ایجنسی (این این اے) کے مطابق جمعہ کے روز ملک کے جنوب میں جیزائن کے علاقے کو ایک فضائی حملے میں نشانہ بنایا گیا، جبکہ ایک صحافی نے طائر کے علاقے میں ڈرون کی پروازوں کی بھی اطلاع دی۔
اسی دوران اے ایف پی کے نمائندے نے جنوبی لبنان کے شہر نبطیہ میں توپ خانے سے مسلسل گولہ باری رپورٹ کی ہے۔ یہ حملے ایسے وقت میں سامنے آئے ہیں جب ایک امریکی اہلکار نے اعلان کیا کہ اسرائیل اور حزب اللہ نے جنگ بندی پر اتفاق کر لیا ہے۔
رپورٹس کے مطابق یہ واضح نہیں ہو سکا کہ نیا حملہ جنگ بندی کے باضابطہ نفاذ کے بعد ہوا یا اعلان کے دوران پیش آیا۔ جنگ بندی مقامی وقت کے مطابق شام چار بجے (پاکستانی وقت کے مطابق شام چھ بجے) سے نافذ العمل ہوئی تھی۔
یہ جنگ بندی امریکہ اور قطر کی ثالثی کی کوششوں کے نتیجے میں طے پائی، جبکہ اس کا اعلان واشنگٹن سے کیا گیا، نہ کہ اسرائیل کے دارالحکومت یروشلم سے۔
عرب میڈیا کی رپورٹس کے مطابق جنگ بندی کے اعلان کے باوجود اسرائیلی فضائی کارروائیاں جاری رہیں، جن میں جنوبی لبنان کے مختلف علاقوں کو نشانہ بنایا گیا۔ بعض غیر مصدقہ رپورٹس میں بتایا گیا ہے کہ گزشتہ رات سے جاری اسرائیلی حملوں میں درجنوں افراد جاں بحق اور متعدد زخمی ہوئے ہیں۔
About The Author
