وزیرِ خارجہ سینیٹر محمد اسحاق ڈار کی دعوت پر کویت کے وزیرِ خارجہ عالی مقام شیخ جراح جابر الاحمد الصباح آج سے دو روزہ پاکستان کا سرکاری دورہ کریں گے۔
وزارتِ امورِ خارجہ کی جانب سے جاری کردہ باضابطہ اعلامیے کے مطابق، دو روزہ دورے کے دوران کویتی وزیرِ خارجہ نائب وزیرِ اعظم و وزیرِ خارجہ اسحاق ڈار کے ساتھ تفصیلی مذاکرات کریں گے۔ دونوں رہنما دوطرفہ تعلقات کی تمام جہتوں کا جائزہ لیں گے اور باہمی دلچسپی کے علاقائی و بین الاقوامی امور اور پیش رفت پر تبادلہ خیال کریں گے۔
دورۂ اسلام آباد کے دوران کویتی وزیرِ خارجہ کی پاکستان کی اعلیٰ قیادت سے تعارفی و رسمی ملاقاتیں بھی متوقع ہیں۔
ترجمان دفترِ خارجہ کے مطابق یہ دورہ پاکستان اور کویت کے درمیان دیرینہ دوطرفہ تعلقات کو مزید مستحکم کرنے اور دونوںبرادر ممالک کے باہمی فائدے کے لیے مختلف شعبوں میں تعاون کو وسعت دینے کے مشترکہ عزم کی عکاسی کرتا ہے
About The Author
