سہیل آفریدی سمیت دیگر پی ٹی آئی رہنماوں کاعمران خان کی ہیلتھ رپورٹ پر تشویش کا اظہار ، ملاقات کا مطالبہ -

وزیراعلیٰ خیبرپختونخوا سہیل آفریدی،اسد قیصر و دیگر قائدین نے نیوز کانفرنس سے خطاب کرتے ہوئے کہا کہ آج سپریم کورٹ میِں بانی کی صحت پرجمع کرائی رپورٹ سامنے آئی ہے، پوری پارٹی قیادت اس پرمشاورت کرے گی،رپورٹ انتہائی تشویش ناک ہے، بانی پی ٹی آئی سےاہلخانہ اورڈاکٹرزکی ملاقات کرائی جائے،اس میں کیاغیرآئینی ہے؟

تفصیلات کے مطابق سہیل آفریدی کا کہناتھا کہ بانی کا بلڈ پریشر 110 یا 120 تک رہتا ہے، آج 140 بائی 80 ہے، بانی سےذاتی معالجین کی ملاقات کرائی جا رہی ہے نہ ہی چیک اپ ہو رہا ہے، جب بانی کو گرفتار کیا گیا اس وقت وہ فٹ تھے، ان کی رپورٹ پر سب کوتشویش ہے، ایک ہی مطالبہ ہے،بانی سےفیملی کی ملاقات ہو،غیرآئینی کیاہے؟، اگربانی سے یہ صورتحال ہو رہی ہے تو عام شہری کی کیاحیثیت ہے؟، اس تمام صورتحال کی ذمہ دار موجودہ حکومت ہے، درخواست کرتے ہیں کہ کل بانی پی ٹی آئی سے ملاقات کرائی جائے، مطالبہ ہے بانی کی فیملی کی مرضی سے علاج بھی ہونا چاہیے، بانی پی ٹی آئی کو کچھ ہوا تو ذمہ دار یہ حکومت ہوگی، انکو جواب دینا ہوگا، یہ جواب دہ ہونگے۔

انہوں نے کہا کہ بانی پی ٹی آئی کے کیس کی کل سماعت ہونی ہے، ہم ریلیف نہیں،انصاف مانگ رہے ہیں، بانی کاعلاج بہترین اسپتال میں ڈاکٹر اور اہلخانہ کی موجودگی میں کرایاجائے، کل بانی پی ٹی آئی سے ملاقات کا دن ہے،کل ہماری ملاقات ہونی چاہیے، ہمیں حقیقت نہیں پتا کہ جیل میں بانی پی ٹی آئی کیساتھ کیاہواہے۔

اسد قیصر

اسدقیصر نے کہا کہ عدالت سے درخواست ہے بانی پی ٹی آئی کو انصاف دیا جائے، نوازشریف بیمار ہوئے تو ہماری حکومت نے اسپتال منتقل کیا تھا، ہماری حکومت نے نواز شریف کے علاج میں کوئی رکاوٹ نہیں ڈالی تھی، اس وقت آئینی حقوق کی بدترین خلاف ورزی ہو رہی ہے، بانی پی ٹی آئی کے کیسز میں انصاف دیاجائے، ہمیں آئینی حقوق نہیں مل رہے، ہمارے ساتھ بنیادی انسانی حقوق کے مطابق معاملات نہیں ہو رہے، بانی پی ٹی آئی کو جیل مینوئل کےمطابق حقوق نہیں دیئے جا رہے، اُمید ہے کل عدالت انصاف کرے گی۔

بیرسٹرگوہر

بیرسٹر گوہر نے گفتگو کرتے ہوئے کہا کہ آج رپورٹ جمع کرائی گئی ہے، تحریک انصاف نے کہا بانی پی ٹی آئی کی صحت پر سیاست نہیں کرتے، بانی پی ٹی آئی کے اہلخانہ کی تشویش ہماری تشویش ہوتی ہے، بانی پی ٹی آئی سے300دن سے ملاقاتیں موجودہیں، ہمارے پاس آزاد ذرائع سے کوئی خبرنہیں آئی کہ بانی کی صحت کیسی ہے، کل بانی سے اہلخانہ، ڈاکٹرز اور وکلاکی ملاقات کرائی جائے، ملاقاتیں ہوں گی تو تشویش ختم ہو گی، جب تک ملاقات نہیں ہوگی تشویش رہے گی،جس کی مذمت کرتےہیں، رپورٹ میں ہے بانی پی ٹی آئی کا بلڈ پریشر ہائی ہے، بانی پی ٹی آئی کو فوری اسپتال منتقل کیا جائے، کل سپریم کورٹ میں ہمارا کیس لگا ہے، بانی پی ٹی آئی سے ملنا تمام بہنوں کا حق ہے،کہاں لکھا ہےکہ علیمہ خان نہیں مل سکتیں۔