بنگلہ دیش کی فوج کا ایک تربیتی طیارہ اسکول پر گر کر تباہ ہو گیا۔ حادثے میں ایک طالب علم جاں بحق جبکہ متعدد زخمی ہو گئے۔
طیارے نے ایک بجکر 6 منٹ پر پرواز بھری تاہم طیارہ ڈھاکا کے علاقے اتارا میں ایک اسکول کی عمارت پر گرکر تباہ ہوگیا۔
بنگلادیشی میڈیا نے واقعے میں ایک شخص کے ہلاک ہونے کی تصدیق کرتے ہوئے بتایا کہ واقعے کے بعد ریسکیو اداروں کے اہلکاروں نے موقع پر پہنچ کر امدادی کارروائیاں شروع کیں جب کہ حادثے کے نتیجے میں کالج کی عمارت میں آگ لگ گئی اور عمارت کو شدید نقصان پہنچا ہے۔
بنگلادیشی فوج کی جانب سے بھی ائیرفورس کے تربیتی طیارے ایف 7 بی جی آئی کو حادثہ پیش آنے کی تصدیق کردی گئی ہے تاہم فوج نے واقعے میں ہلاکتوں اور پائلٹ سے متعلق کوئی معلومات جاری نہیں کیں۔
جائے حادثہ پر موجود ریسکیو حکام نے بتایا کہ حادثے میں 4 افراد زخمی بھی ہوئے ہیں جنہیں فوری طبی امداد کے لیے سی ایم ایچ منتقل کیا گیا ہے۔