وزیراعظم شہباز شریف نے ملک مں ہنرمند اور تربیت یافتہ نوجوانوں کی افرادی قوت پیدا کرنے کیلئے اسکلڈ امیپکٹ بانڈز جاری کرنے کی منظوری دیدی ہے۔۔ ملکی تاریخ میں پہلی بار اس طرز کے بانڈز جاری کئے جائیں گے
وزیرِ اعظم شہباز شریف کی زیرِ صدارت نوجوانوں کو روزگار کی فراہمی کے حوالے سے روڈ میپ پر جائزہ اجلاس ہوا جس میں وفاقی وزراء احد خان چیمہ، عطاء اللہ تارڑ، چیئرمین وزیرِ اعظم یوتھ پروگرام رانا مشہود احمد خان، رکن قومی اسمبلی آمنہ بتول اور متعلقہ اعلی حکام نے شرکت کی۔۔
وزیراعظم نے پاکستان کے پہلے Skills Impact Bond کی منظوری دیتے ہوئے کہا یہ جدید ماڈل نوجوانوں کو روزگار کے قابل بنانے کیلئے نجی سرمایہ کاری کو راغب کرے گا۔۔ اس نظام کے تحت نوجوانوں کو عصری تقاضوں سے ہم آہنگ ایسے ہنر سکھائے جائیں گے جس سے پاکستان کے نوجوان با اختیار اور ملکی اقتصادی ترقی میں اپنا اہم کردار ادا کر سکیں گے۔۔
وزیراعظم نے نوجوانوں کی استعداد کار کو بڑھانے، عصری تقاضوں سے ہم آہنگ ہنر کی تربیت اور تربیت کے بعد روزگار یقینی بنانے کیلئے مزید اقدمات کرنے کی ہدایت کی اور یوتھ پروگرام، وزارت امور سمندر پار مقیم پاکستانی، نیووٹیک اور تمام متعلقہ اداروں کی نوجوانوں کو روزگار کی فراہمی کے حوالے سے اب تک کی کارکردگی پر اطمینان کا اظہار بھی کیا۔۔
وزیراعظم نے کہا پاکستانی نوجوانوں کو بیرون ملک روزگار کے حصول میں معاونت کیلئے ان ممالک کی مقامی زبانوں کی تعلیم کے مواقع فراہم کئے جائیں۔۔ نوجوانوں کو پاکستان اور بیرون ملک روزگار کے مواقع اور حصول کی تعداد کے تخمینے پر مبنی ایک جامع روڈمیپ پیش کیا جائے، ہر دو ماہ میں اس پر عملدرآمد کی پیش رفت کا خود جائزہ لوں گا۔۔
شہباز شریف نے کہا بیرون ملک روزگار کے حصول کیلئے ہنر مند افراد کی تیاری کو ترجیح دی جائے۔۔ نوجوانوں کو ڈیجیٹل یوتھ ہب پر موجود روزگار کے مواقع کے حوالے سے آگاہی فراہم کرنے کیلئے مہم چلائی جائے۔۔ پاکستان کے باصلاحیت نوجوان پاکستان کا سب سے قیمتی اثاثہ ہیں۔۔
وزیراعظم نے کہا نوجوانوں کو روزگار کے قابل تعلیم و ہنر کی فراہمی سے اس ملک کی تقدیر بدلیں گے۔۔ پاکستان کے باصلاحیت نوجوان دنیا بھر میں پاکستان کا نام روشن کررہے ہیں.
اجلاس کو بریفنگ میں بتایا گیا کہ وفاقی حکومت وزیرِ اعظم کی ہدایت پر نوجوانوں کو روزگار کے قابل بنانے کیلئے ہنر و تعلیم کی فراہمی کے ساتھ پاکستان و بیرون ملک روزگار کو یقینی بنانے کیلئے جامع اقدامات کر رہی ہے۔۔ اجلاس کو پروگرام کے تحت نوجوانوں کو پاکستان اور بیرون ملک روزگار کی فراہمی کا سالانہ تخمینہ بھی بتایا گیا.
پروگرام نوجوانوں کو با اختیار بنا کر روزگار میں خودکفالت، آنٹرپرونیورشپ اور براہ راست نوکریوں کے حصول میں معاونت کر رہا ہے ۔۔
بریفنگ میں کہا گیا کہ ڈیجیٹل یوتھ ہب کے تحت اب تک پانچ لاکھ سے زائد افراد رجسٹرڈ ہو چکے جبکہ 17 لاکھ سے زائد لوگوں نے اس کی ایپلیکیشن کو ڈاؤن لوڈ کیا۔۔ 5سو سے زائد کمپنیاں رجسٹرڈ ہونے کے علاوہ پاکستان میں 47 ہزار سے زائد جبکہ ایک لاکھ سے زائد بیرون ملک روزگار کے مواقع اور 2 ہزار سے زائد اسکالر شپس موجود ہیں۔۔
پورٹل سے بیرون ملک پاکستانی سفارتخانوں، سرکاری اداروں، نجی کمپنیوں اور بشمول اقوام متحدہ دیگر این جی اوز سمیت 5 سو سے زائد ادارے منسلک ہیں۔۔
