مقبوضہ مغربی کنارے کے جنوب میں گش ایٹزیون علاقائی کونسل کی جانب سے نئی بستی کے قیام کے اعلان پر اسرائیل کی آبادکاری مخالف تنظیم پیس ناؤ نے سخت ردعمل ظاہر کیا ہے۔
اے ایف پی کے مطابق، گش ایٹزیون کونسل کے صدر یارون روزینٹل نے بیت اللحم کے قریب شڈیما میں نئی بستی قائم کرنے کا اعلان کیا۔ ان کا کہنا تھا کہ "5,000 سالوں سے یہودی بیت المقدس میں واپسی کی دعا کرتے آئے ہیں اور آج ہم نے یہ کامیابی حاصل کی ہے۔” ابتدائی طور پر علاقے میں تین موبائل گھر قائم کیے گئے ہیں اور متعلقہ خاندان ہفتے کے آخر میں منتقل ہوں گے۔
پیس ناؤ نے ایک بیان میں کہا کہ نئی بستی کا مقصد فلسطینی قصبے بیت صحور کو محدود کرنا اور اس کی ترقی کو روکنا ہے۔ تنظیم نے مزید کہا کہ آبادکاروں کی یہ سرگرمی بین الاقوامی قوانین کی خلاف ورزی ہے اور اسرائیل کے امن اور دو ریاستی حل کے امکانات کو نقصان پہنچا رہی ہے۔
مغربی کنارے میں قائم تمام بستیاں بین الاقوامی قوانین کے تحت غیر قانونی سمجھی جاتی ہیں۔ گش ایٹزیون علاقے میں حالیہ دنوں میں آبادکاروں اور فلسطینی باشندوں کے درمیان متعدد پرتشدد واقعات بھی دیکھنے میں آئے ہیں۔ مشرقی یروشلم کو چھوڑ کر، تقریباً 500,000 اسرائیلی آباد کار مغربی کنارے میں تقریباً 30 لاکھ فلسطینی باشندوں کے ساتھ رہائش پذیر ہیں۔
About The Author
