اسلام آباد/گلگت بلتستان — پاکستان سمیت دنیا بھر میں آج عالمی دنِ پہاڑ منایا جا رہا ہے۔ اس موقع پر پہاڑی سلسلوں کے تحفظ اور ماحولیاتی خطرات سے بچاؤ کے لیے شعور اجاگر کرنے کی ضرورت پر زور دیا جا رہا ہے۔
آزاد کشمیر اور گلگت بلتستان کے پہاڑی سلسلے
آزاد کشمیر کے زیادہ تر پہاڑی سلسلے سال کے بیشتر حصے میں برف سے ڈھکے رہتے ہیں اور سیاحوں کو اپنی قدرتی خوبصورتی سے مسحور کر دیتے ہیں۔ گلگت بلتستان میں دنیا کی 24 بلند چوٹیوں میں سے 8 موجود ہیں، جبکہ دنیا کی دوسری بلند ترین چوٹی کے ٹو (8611 میٹر) پاکستان میں واقع ہے، جو اپنی بلند و بالا بلندی اور خوبصورتی کے باعث عالمی سطح پر کلائمبرز کی توجہ کا مرکز ہے۔
کے ٹو کی مہم جوئی اور کلائمبرز کی کامیابیاں
کے ٹو کی چوٹی کو سر کرنے کے لیے ہر سال دنیا بھر سے کلائمبرز گلگت بلتستان آتے ہیں۔ اب تک 91 کلائمبرز نے اپنی جان کی قربانی دی ہے، جبکہ 377 نے کامیابی سے چوٹی سر کی ہے۔ پاکستان میں تقریباً 108 چوٹیوں کی بلندی 7 ہزار میٹر سے زائد ہے، جبکہ چھ ہزار میٹر سے کم کی چوٹیاں لامحدود ہیں۔
پہاڑ اور انسانی زندگی میں اہمیت
پہاڑ نہ صرف قدرتی حسن کا مظہر ہیں بلکہ انسانی زندگی اور ماحولیاتی نظام کے لیے بھی انتہائی اہم کردار ادا کرتے ہیں۔ یہ جنگلات کی پرورش، برف باری اور پانی کے ذخائر فراہم کرنے میں مددگار ہیں اور انسانی زندگی کے لیے حیاتیاتی توازن قائم رکھتے ہیں۔
ماہرین ماحولیات کا کہنا ہے کہ عالمی دنِ پہاڑ کی تقریب ہمیں یاد دلاتی ہے کہ ہمیں اپنے پہاڑی سلسلوں کے تحفظ اور ماحولیاتی توازن کے لیے فوری اور مؤثر اقدامات کرنے کی ضرورت ہے۔
About The Author
