واشنگٹن – امریکی صدر ڈونلڈ ٹرمپ کے اعلان کردہ ’’گولڈن ڈوم‘‘ میزائل دفاعی منصوبے کو اپنے آغاز کے ایک سال بعد بھی خاطر خواہ پیش رفت حاصل نہیں ہو سکی، کیونکہ تکنیکی اختلافات اور خلا میں نصب کیے جانے والے نظام کے حوالے سے خدشات کے باعث اربوں ڈالر کی فنڈنگ تاخیر کا شکار ہے۔
27 جنوری 2025 کو دستخط کیے گئے ایگزیکٹو آرڈر کے تحت اس منصوبے کا مقصد 2028 تک ایک جامع قومی میزائل دفاعی نظام تیار کرنا تھا، تاہم ایک سال گزرنے کے باوجود پروگرام عملی تعطل کا شکار دکھائی دیتا ہے۔
ذرائع کے مطابق گزشتہ موسمِ گرما میں اس منصوبے کے لیے مختص کیے گئے 25 ارب ڈالر میں سے اب تک زیادہ تر رقم خرچ نہیں کی جا سکی، کیونکہ حکام ابھی تک اس کے بنیادی خلائی اجزا کے ڈیزائن اور نوعیت پر اتفاق رائے پیدا نہیں کر سکے۔
دو امریکی حکام نے بتایا کہ میزائل دفاعی شیلڈ کے مجموعی فنِ تعمیر (architecture) کو حتمی شکل دینے کا عمل تاحال جاری ہے اور بڑے پیمانے پر فنڈز کے اجراء کا آغاز نہیں ہو سکا۔
حکام کا کہنا ہے کہ اگرچہ رقم دستیاب ہے، تاہم اہم تکنیکی فیصلے ہونے کے بعد ہی آئندہ دنوں میں نمایاں فنڈنگ جاری کی جا سکے گی۔
پینٹاگون کے ایک اہلکار نے رائٹرز کے سوالات کے جواب میں کہا کہ ’’گولڈن ڈوم آفس ایگزیکٹو آرڈر میں طے کیے گئے اہداف پر کام جاری رکھے ہوئے ہے۔‘‘
انہوں نے مزید کہا کہ ’’عمل درآمد کا منصوبہ اور اس سے وابستہ ٹیکنالوجیز مسلسل ارتقا کے عمل میں ہیں، تاہم نظام کے بنیادی ڈھانچے کے اہم اجزا اب طے ہو چکے ہیں، جبکہ ان کی تفصیلات کو خفیہ قرار دیا گیا ہے۔‘‘
About The Author
