برطانوی وزیرِاعظم کیئر سٹارمر کی بیجنگ میں صدر شی جن پنگ سے ملاقات، چین کو عالمی سطح پر اہم کھلاڑی قرار دیا
بیجنگ – برطانیہ کے وزیرِاعظم سر کیئر سٹارمر نے اپنے سرکاری دورۂ چین کے دوران چینی صدر شی جن پنگ سے بیجنگ میں ملاقات کی، جس میں دوطرفہ تعلقات، عالمی امور اور معاشی تعاون پر تبادلۂ خیال کیا گیا۔
یہ دورہ اس لحاظ سے غیر معمولی اہمیت رکھتا ہے کہ 2018 کے بعد چین کا دورہ کرنے والے کیئر سٹارمر پہلے برطانوی وزیرِاعظم ہیں۔ دورے کے حوالے سے امریکی صدر ڈونلڈ ٹرمپ کی جانب سے تحفظات کا اظہار بھی کیا گیا تھا۔
ملاقات کے آغاز پر گفتگو کرتے ہوئے وزیرِاعظم کیئر سٹارمر نے چین کو عالمی سیاست اور معیشت میں ایک اہم کھلاڑی قرار دیتے ہوئے کہا کہ وہ دونوں ممالک کے تعلقات کو نئی جہت دینے کے خواہاں ہیں۔
انہوں نے کہا کہ برطانیہ اور چین کے درمیان تعمیری اور سنجیدہ تعلقات نہ صرف دونوں ممالک بلکہ عالمی استحکام کے لیے بھی اہم ہیں۔
چینی صدر شی جن پنگ نے اس موقع پر کہا کہ چین کے ساتھ تعلقات ایک ناگزیر حقیقت ہیں اور وہ اس بات پر قدر دان ہیں کہ برطانیہ طویل المدتی نقطۂ نظر اپنانے کی جانب بڑھ رہا ہے۔
ان کا کہنا تھا کہ اچھی شراکت داری وقت اور محنت مانگتی ہے، ہمیں اختلافات سے بالاتر ہو کر باہمی احترام کو برقرار رکھتے ہوئے آگے بڑھنا چاہیے اور تعلقات کو مستقل بنیادوں پر استوار کرنا ہوگا۔
وزیرِاعظم سٹارمر نے گریٹ ہال آف دی پیپل میں ہونے والی ملاقات کے دوران اس بات کا بھی ذکر کیا کہ ایک طویل عرصے کے بعد کسی برطانوی وزیرِاعظم کا چین کا دورہ ہو رہا ہے، جو دونوں ملکوں کے تعلقات میں نئے باب کا آغاز ہو سکتا ہے۔
چین کے ساتھ بہتر روابط کے معاشی فوائد پر زور دیتے ہوئے کیئر سٹارمر نے کہا کہ وہ اس دورے میں برطانوی عوام کے مفادات کو پیشِ نظر رکھتے ہوئے چین آئے ہیں۔
ان کا کہنا تھا کہ عالمی سطح پر ہونے والے واقعات براہِ راست برطانیہ کے عوام کو متاثر کرتے ہیں، چاہے وہ روزمرہ اشیاء کی قیمتیں ہوں یا قومی سلامتی کا احساس۔ اسی لیے عالمی طاقتوں کے ساتھ سنجیدہ اور ذمہ دارانہ روابط ناگزیر ہیں۔
قبل ازیں وزیرِاعظم کیئر سٹارمر 60 کاروباری اور ثقافتی رہنماؤں پر مشتمل وفد کے ہمراہ چین پہنچے تھے۔ انہوں نے امید ظاہر کی کہ یہ دورہ تجارت، سرمایہ کاری اور ثقافتی روابط کے فروغ کے ذریعے برطانوی عوام کے لیے عملی فوائد لے کر آئے گا۔
دوسری جانب چینی حکومت نے اس دورے کا خیرمقدم کرتے ہوئے کہا تھا کہ کیئر سٹارمر کا دورہ سیاسی باہمی اعتماد میں اضافے اور عملی تعاون کو گہرا کرنے کا اہم موقع فراہم کرے گا۔
تجزیہ کاروں کے مطابق یہ ملاقات ایسے وقت میں ہوئی ہے جب عالمی سیاست میں طاقتوں کے توازن، امریکا۔چین تعلقات اور یورپ کی خارجہ پالیسی نئے موڑ پر کھڑی ہے، جس میں برطانیہ کا چین سے رابطہ خاص اہمیت اختیار کر گیا ہے۔
About The Author
