بیجنگ — چین نے برطانوی شہریوں کو بغیر ویزا ملک میں داخل ہونے کی اجازت دینے کا اعلان کر دیا ہے، جس کے تحت برطانوی شہری 30 دن تک چین میں قیام کر سکیں گے۔
عالمی خبر رساں ادارے کے مطابق اس فیصلے کا اعلان برطانوی وزیراعظم سر کیئر اسٹارمر نے چینی صدر شی جن پنگ سے ملاقات اور باہمی بات چیت کے بعد کیا۔
برطانوی وزیراعظم کے مطابق نئے معاہدے کے تحت ویزا فری سہولت سیاحت کے ساتھ ساتھ کاروباری مقاصد کے لیے بھی دستیاب ہوگی، جس سے دونوں ممالک کے درمیان معاشی اور تجارتی روابط کو فروغ ملے گا۔
برطانیہ ویزا فری ممالک کی فہرست میں شامل
چین کے اس فیصلے کے بعد برطانیہ ان 50 ممالک میں شامل ہو گیا ہے جنہیں چین ویزا فری سفر کی سہولت فراہم کرتا ہے۔ اس فہرست میں پہلے ہی فرانس، جرمنی، اسپین اور اٹلی جیسے یورپی ممالک شامل ہیں۔
اس وقت برطانوی شہریوں کے لیے چین کا ویزا 100 پاؤنڈ سے زائد لاگت میں تیار ہوتا ہے، جو عام طور پر ایک ہفتے میں جاری کیا جاتا ہے، جبکہ اضافی فیس کے عوض فوری ویزا کی سہولت بھی موجود ہے۔
کاروباری روابط کو فروغ دینے پر زور
سر کیئر اسٹارمر نے اس موقع پر کہا کہ “دنیا کی بڑی معیشتوں میں شمار ہونے کے باعث برطانوی کاروباری ادارے چین میں اپنے مواقع بڑھانا چاہتے ہیں۔ ویزا قواعد میں نرمی سے برطانوی کمپنیوں کو بیرونِ ملک توسیع، جبکہ وطن میں ترقی اور روزگار کے مواقع پیدا کرنے میں مدد ملے گی۔”
مستقبل میں دوطرفہ ویزا معاہدے پر بات چیت
برطانیہ اور چین نے اس بات پر بھی اتفاق کیا ہے کہ مستقبل میں دو طرفہ ویزا سروس معاہدے پر باضابطہ مذاکرات کا آغاز کیا جائے گا، جس سے دونوں ممالک کے شہریوں کے لیے سفر مزید آسان ہو سکے گا۔
نیا شراکتی معاہدہ بھی طے
اس موقع پر دونوں ممالک کے درمیان ایک نئے شراکتی معاہدے پر بھی دستخط کیے گئے، جس کا مقصد:
-
چین میں برطانوی کمپنیوں کو بہتر مارکیٹ رسائی
-
صحت، تعلیم، ہنرمندی اور پیشہ ورانہ تربیت
-
مالیاتی، قانونی اور سروس سیکٹر میں نجی و سرکاری شراکت داری کا فروغ
قرار دیا گیا ہے۔
اقتصادی تعلقات میں نئی پیش رفت
واضح رہے کہ چین دنیا کی دوسری بڑی معیشت جبکہ برطانیہ اس کا تیسرا بڑا تجارتی شراکت دار ہے۔ ماہرین کے مطابق ویزا فری سہولت سے دونوں ممالک کے درمیان تجارتی، سیاحتی اور سرمایہ کاری روابط میں نمایاں بہتری متوقع ہے۔
About The Author
